മുത്തങ്ങ ഭാഗത്ത് കൂടി സ്പീഡിലെത്തിയ സ്വിഫ്റ്റ് കാർ; പിടിച്ചുനിർത്തിയുള്ള പരിശോധനയിൽ സീറ്റിന് അടിയില്‍ കണ്ടത്; രണ്ടുപേരെ സ്പോട്ടിൽ പൊക്കി പോലീസ്
സുൽത്താൻ ബത്തേരി: മുത്തങ്ങ ചെക്ക് പോസ്റ്റിൽ കാറിൽ കടത്താൻ ശ്രമിച്ച 95.93 ഗ്രാം എം.ഡി.എം.എ പിടികൂടിയ സംഭവത്തിൽ, മയക്കുമരുന്ന് വാങ്ങാൻ ഗൂഢാലോചന നടത്തുകയും പണം നൽകുകയും ചെയ്ത രണ്ട് പേർ കൂടി അറസ്റ്റിലായി. മലപ്പുറം സ്വദേശികളായ അബ്ദുൾ ഹമീദ് (45), കെ.എം. റാഷിദ് (28) എന്നിവരെയാണ് ബത്തേരി പോലീസ് കോട്ടക്കലിൽ നിന്ന് പിടികൂടിയത്.
ഇക്കഴിഞ്ഞ 22-ാം തീയതി രാവിലെ മുത്തങ്ങ ചെക്ക് പോസ്റ്റിൽ വെച്ച് കോട്ടക്കൽ വെസ്റ്റ് വില്ലൂർ സ്വദേശി ഷമീം (33)നെ ജില്ലാ ലഹരി വിരുദ്ധ സ്ക്വാഡും ബത്തേരി പോലീസും ചേർന്ന് പിടികൂടിയ കേസിലാണ് ഇപ്പോൾ കൂടുതൽ അറസ്റ്റ് രേഖപ്പെടുത്തിയിരിക്കുന്നത്.
ഷമീം സഞ്ചരിച്ച സ്വിഫ്റ്റ് കാറിൻ്റെ സീറ്റിനടിയിൽ ഒളിപ്പിച്ച നിലയിലായിരുന്നു മയക്കുമരുന്ന് കണ്ടെത്തിയത്. ഷമീമിന് ബെംഗളൂരുവിൽ മയക്കുമരുന്ന് വാങ്ങാനുള്ള സ്ഥലം പങ്കുവെച്ചതും ലഹരി വാങ്ങാനുള്ള പണം നൽകിയതും അറസ്റ്റിലായ അബ്ദുൾ ഹമീദും കെ.എം. റാഷിദുമാണ്. ഇവരുടെ ഫോണുകൾ പരിശോധിച്ചതിൽ നിന്ന് മയക്കുമരുന്ന് കച്ചവടവുമായി ബന്ധപ്പെട്ട ചാറ്റുകളും വീഡിയോകളും പോലീസിന് ലഭിച്ചിട്ടുണ്ട്.
