ആളുകൾ സിന്ധുവിന്റെ വീട്ടിൽ ഓടിയെത്തുന്നത് ഒരൊറ്റ ആവശ്യത്തിന്; ഒറ്റ മുറി വീട്ടിൽ പാചകം ചെയ്യുന്നത് സ്ഥിരം പരിപാടി; ഒടുവിൽ എക്സൈസ് പാഞ്ഞെത്തിയപ്പോൾ കള്ളത്തരം പുറത്ത്
തിരുവനന്തപുരം: ക്രിസ്മസ് ദിനങ്ങളിൽ കൂടിയ വിലയ്ക്ക് വിൽക്കുന്നതിനായി തയ്യാറാക്കിയ വൻതോതിലുള്ള ചാരായവുമായി പെരിങ്ങമ്മല സ്വദേശി എക്സൈസ് പിടിയിലായി. നെയ്യാറ്റിൻകര എക്സൈസ് സർക്കിൾ ഓഫീസിലെ ഉദ്യോഗസ്ഥർക്ക് ലഭിച്ച രഹസ്യ വിവരത്തിന്റെ അടിസ്ഥാനത്തിൽ പെരിങ്ങമ്മലയിലെ ഒരു ഒറ്റമുറി വീട്ടിൽ നടത്തിയ പരിശോധനയിലാണ് അറസ്റ്റ്. പിടിയിലായ വ്യക്തി രാജീവ് (56) ആണ്. ഇയാൾ 'സിന്ധു' എന്ന പേരിലും അറിയപ്പെടുന്നു.
പരിശോധനയിൽ ഇയാളിൽ നിന്ന് 13 ലിറ്റർ ചാരായവും, വാറ്റാനായി തയ്യാറാക്കി വെച്ചിരുന്ന 110 ലിറ്റർ വാഷും പിടിച്ചെടുത്തു. കൂടാതെ, ചാരായം വാറ്റാൻ ഉപയോഗിച്ച പാത്രങ്ങൾ, സ്റ്റൗ, ഗ്യാസ് സിലിണ്ടർ, വിൽപ്പനയ്ക്ക് ഉപയോഗിച്ച സ്കൂട്ടർ എന്നിവയും കസ്റ്റഡിയിലെടുത്തു.
സുഹൃത്തിന്റെ വീട്ടിൽ വെച്ച് രഹസ്യമായി ചാരായം വാറ്റി സ്കൂട്ടറിൽ എത്തിച്ച് വിൽക്കുകയായിരുന്നു ഇയാളുടെ രീതിയെന്ന് എക്സൈസ് അറിയിച്ചു. സ്ഥലം ഉടമയായ സുഹൃത്തിന്റെ പങ്കും എക്സൈസ് അന്വേഷിക്കുന്നുണ്ട്. രാജീവിനെതിരെ മുൻപും അബ്കാരി കേസുകൾ നിലവിലുണ്ടെന്ന് ഉദ്യോഗസ്ഥർ വ്യക്തമാക്കി.
