മട്ടന്നൂർ: വിന്റർ ഷെഡ്യൂളിൽ കണ്ണൂർ അന്താരാഷ്ട്രവിമാനത്താവളത്തിൽ നിന്ന് എയർ ഇന്ത്യാ എക്സ്പ്രസ് നടത്തുന്ന കണ്ണൂർ-ബംഗ്ളൂര് സമയക്രമം മാറ്റി. ഡിസംബർ നാലുമുതൽ 2024ജനുവരി ഒന്നുവരെയാണ് സമയംമാറ്റിയത്. വെളുപ്പിന് 4.55ന് ബംഗ്ളൂരിൽ നിന്നും പുറപ്പെട്ടു 6.15-ന് കണ്ണൂരിൽ എത്തുന്ന വിമാനം 6.45-ന് കണ്ണൂരിൽ നിന്നും പുറപ്പെട്ട് 8.05-ന് ബംഗ്ളൂരിലെത്തുന്ന തരത്തിലാണ് പുതിയ സമയ ക്രമം. ഡിസംബർ 9,14 തീയ്യതികളിൽ സർവീസില്ല. ജനുവരി രണ്ടുമുതൽ പഴയസമയക്രമത്തിലേക്ക് തിരിച്ചുവരും.
നവംബർ 15-നാണ് എയർ ഇന്ത്യ എക്സ്പ്രസിന്റെ ആദ്യ കണ്ണൂർ-ബംഗ്ളൂര് സർവീസ് തുടങ്ങിയത്. അധികദിവസം രണ്ടുമണിക്കൂർ വൈകിയാണ് സർവീസ് നടത്തിയിരുന്നത്. വളരെ നേരത്തെ വിമാനത്താവളത്തിൽ എത്തി കാത്തിരിക്കേണ്ടി വരുന്ന സാഹചര്യം ഒഴിവാക്കുന്നതിനായി ടേക്ക് ഓഫ് സമയം മാറ്റിനിശ്ചയിക്കണമെന്ന ആവശ്യവുമായി യാത്രക്കാർ രംഗത്തുവന്നിരുന്നു.
ഉച്ചയ്ക്ക് 2.40-ന് ബംഗ്ളൂരിൽ നിന്ന് പുറപ്പെട്ടു വൈകുന്നേരം നാലുമണിക്ക് കണ്ണൂരിലെത്തി നാലരയ്ക്ക് കണ്ണൂരിൽ നിന്നും പുറപ്പെട്ടു 5.50ന് ബംഗ്ളൂരിലെത്തുന്ന തരത്തിലായിരുന്നു സർവീസ് നടത്തിയത്. കണ്ണൂരിൽ നിന്നും ഏറ്റവും യാത്രക്കാരുള്ള റൂട്ടാണ് ബംഗ്ളൂര്. ഈ സീസണിൽ ആഭ്യന്തര യാത്രക്കാരുടെ എണ്ണത്തിൽ വൻവർധനവ് എയർ ഇന്ത്യാ എക്സ്പ്രസ് പ്രതീക്ഷിക്കുന്നുണ്ട്.
