മൂവായിരത്തോളം ശുചീകരണ തൊഴിലാളികളെ റെഡിയാക്കി; പൊങ്കാല കഴിഞ്ഞാൽ ഏറ്റവും ചുരുങ്ങിയ സമയംകൊണ്ട് നഗരം വൃത്തിയാകും; ഉറപ്പ് നൽകി മേയർ വി.വി. രാജേഷ്

തിരുവനന്തപുരം: സൗഹൃദത്തിന്റെയും ഭക്തിയുടെയും സംഗമമായ ആറ്റുകാൽ പൊങ്കാലയ്ക്കായി അനന്തപുരി സർവ്വസജ്ജമായെന്ന് തിരുവനന്തപുരം നഗരസഭ. 2026-ലെ ആറ്റുകാൽ പൊങ്കാല മഹോത്സവം സുഗമമായി നടത്തുന്നതിനായുള്ള ഒരുക്കങ്ങൾ പൂർത്തിയായതായി മേയർ വി.വി. രാജേഷ് വാർത്താസമ്മേളനത്തിൽ അറിയിച്ചു.

പൊങ്കാല ഭക്തർക്ക് തടസ്സമില്ലാതെ സഞ്ചരിക്കാനും അടുപ്പുകൾ കൂട്ടാനുമായി നഗരത്തിലെ പ്രധാന റോഡുകളുടെ അറ്റകുറ്റപ്പണികൾ പൂർത്തിയാക്കി. പൊങ്കാലയ്ക്ക് ശേഷമുള്ള മാലിന്യങ്ങൾ ഉടനടി നീക്കം ചെയ്യാൻ രണ്ടായിരത്തിലധികം ശുചീകരണ തൊഴിലാളികളെ വിന്യസിച്ചു. കൂടാതെ നഗരസഭയുടെ പ്രത്യേക സ്ക്വാഡുകളും രംഗത്തുണ്ടാകും.

ഭക്തർക്കായി ശുദ്ധജല വിതരണവും അടിയന്തര വൈദ്യസഹായം നൽകാൻ മെഡിക്കൽ ക്യാമ്പുകളും ആംബുലൻസ് സൗകര്യങ്ങളും ഏർപ്പെടുത്തിയിട്ടുണ്ട്.നഗരത്തിലെ തെരുവുവിളക്കുകൾ പ്രവർത്തനക്ഷമമാണെന്ന് ഉറപ്പുവരുത്തി. ഫയർഫോഴ്സും പോലീസും ചേർന്ന് കർശന സുരക്ഷാ ക്രമീകരണങ്ങളാണ് ഒരുക്കിയിരിക്കുന്നത്.

ഗ്രീൻ പ്രോട്ടോക്കോൾ പൂർണ്ണമായും പാലിച്ചുകൊണ്ടായിരിക്കും ഇത്തവണത്തെ പൊങ്കാല. നഗരസഭയുടെയും വിവിധ സർക്കാർ വകുപ്പുകളുടെയും ഏകോപനത്തിലൂടെ ഭക്തർക്ക് മികച്ച സൗകര്യങ്ങൾ ഉറപ്പാക്കുമെന്നും മേയർ വ്യക്തമാക്കി. ലക്ഷക്കണക്കിന് സ്ത്രീകൾ പങ്കെടുക്കുന്ന ഈ ലോകപ്രശസ്ത ചടങ്ങിനെ വരവേൽക്കാൻ തിരുവനന്തപുരം നഗരം ഇപ്പോൾ പൂർണ്ണ സജ്ജമാണ്.