പാണക്കാട് ബഷീറലി ശിഹാബ് തങ്ങൾ സഞ്ചരിച്ച കാർ അപകടത്തിൽപ്പെട്ടു; അപകടം ബാലുശ്ശേരിയിൽ വെച്ച്; ചികിത്സ തേടി

കോഴിക്കോട്: പാണക്കാട് ബഷീറലി ശിഹാബ് തങ്ങൾ സഞ്ചരിച്ച കാർ അപകടത്തിൽപ്പെട്ടു. കോഴിക്കോട് ബാലുശ്ശേരിയിൽ പുത്തൂർവട്ടത്ത് വച്ചാണ് സംഭവം ഉണ്ടായത്. ബഷീറലി ശിഹാബ് തങ്ങൾ സഞ്ചരിച്ച ഇന്നോവ കാർ നിയന്ത്രണംവിട്ട് ഇലക്ട്രിക്ക് പോസ്റ്റിൽ ഇടിച്ചാണ് അപകടം ഉണ്ടായത്.

പേരാമ്പ്രയിലേക്ക് പോകുമ്പോഴായിരുന്നു അപകടമുണ്ടായത്. അതേസമയം അപകടത്തിൽ ഗുരുതരമായ പരിക്കുകൾ ഒന്നുമില്ലെന്ന് മുസ്ലിം ലീഗ് സംസ്ഥാന അധ്യക്ഷൻ സാദിഖ് അലി ഷിഹാബ് തങ്ങൾ അറിയിച്ചു. പ്രാഥമിക ശുശ്രൂഷകൾക്ക് ശേഷം ബഷീറലി വീട്ടിലെത്തിയതായും തങ്ങൾ അറിയിച്ചു.

സാദിഖ് അലി ഷിഹാബ് തങ്ങളിന്റെ ഫേസ്‌ബുക്ക് പോസ്റ്റ് ഇങ്ങനെ:

പാണക്കാട് സയ്യിദ് ബഷീറലി ശിഹാബ് തങ്ങളുടെ അപകട വിവരമറിഞ്ഞ് മിഡിയകളും പ്രിയപ്പെട്ടവരുമായി നിരവധി പേർ ബന്ധപ്പെട്ട് കൊണ്ടിരിക്കുന്നുണ്ട്. കോഴിക്കോട് ബാലുശ്ശേരിയിൽ വച്ചായിരുന്നു അപകടം സംഭവിച്ചത്. മൊടക്കല്ലൂർ മലബാർ മെഡിക്കൽ കോളേജ് ആശുപത്രിയിലെ പ്രാഥമിക പരിശോധനകൾക്ക് ശേഷം അദ്ദേഹം സുഖമായി വീട്ടിലെത്തിയിട്ടുണ്ട്. അദ്ദേഹവുമായി സംസാരിച്ച് സുഖവിവരങ്ങൾ വിലയിരുത്തി. പ്രിയപ്പെട്ടവരുടെ പ്രാർത്ഥനകൾക്കും സ്‌നേഹാന്വേഷണങ്ങൾക്കും നന്ദി.

അല്ലാഹുവിന്റെ കാരുണ്യം നമ്മുടെ മേൽ എപ്പോഴും ഉണ്ടാവട്ടെ.