മലപ്പുറം: തിരൂരിൽ ഓർഡർ ചെയ്ത ബിരിയാണിയിൽ നിന്ന് കോഴിത്തല കണ്ടെത്തി. ഏഴൂർ പി സി പടിയിലെ കളരിക്കൽ പ്രതിഭ എന്ന അദ്ധ്യാപിക വാങ്ങിയ നാലു ബിരിയാണിയിൽ ഒന്നിലാണ് കോഴിത്തല കണ്ടെത്തിയത്.

മുത്തൂരിലെ ഹോട്ടലിൽ നിന്ന് കഴിഞ്ഞ ദിവസം രാത്രിയാണ് ബിരിയാണി ഓർഡർ ചെയ്തത്. രണ്ട് ബിരിയാണി കുട്ടികൾ കഴിച്ചിരുന്നു. പിന്നീട് മൂന്നാമത്തെ കവർ തുറന്നപ്പോഴാണ് കോഴിത്തല കണ്ടത്. ഉടൻ തന്നെ തിരൂർ നഗരസഭ ആരോഗ്യ വിഭാഗത്തിനും ഫുഡ് സേഫ്റ്റി ഓഫീസർക്കും പരാതി നൽകുകയായിരുന്നു.

ഭക്ഷ്യസുരക്ഷ എൻഫോഴ്സ്മെന്റ് അസിസ്റ്റന്റ് കമ്മീഷണർ സുജിത്ത് പെരേര, ഭക്ഷ്യ സുരക്ഷ ഓഫീസർ എം എൻ ഷംസിയ എന്നിവരുടെ നേതൃത്വത്തിൽ ഹോട്ടലിൽ പരിശോധന നടത്തി. തുടർന്ന് ഹോട്ടൽ ഭക്ഷ്യസുരക്ഷ വകുപ്പ് പൂട്ടിച്ചു.