ആളെ ഇറക്കാൻ സ്റ്റോപ്പിൽ ചവിട്ടിനിർത്തിയ ബസ്; മുൻഭാഗത്തെ ഡോർ തുറന്നതും പുറത്തേക്ക് തെറിച്ചു വീണ് മാരക പരിക്ക്; പാലക്കാട് ചികിത്സയിലായിരുന്ന കണ്ടക്ടർക്ക് ദാരുണാന്ത്യം

പാലക്കാട്: വടക്കഞ്ചേരിയിൽ ഓടുന്ന സ്വകാര്യ ബസിൽ നിന്ന് തെറിച്ചുവീണ് ഗുരുതരമായി പരിക്കേറ്റ് ചികിത്സയിലായിരുന്ന കണ്ടക്ടർ മരിച്ചു. മംഗലംഡാം ഓലിംകടവ് സ്വദേശി ജിബിൻ (49) ആണ് ഇന്നലെ രാവിലെ 11 മണിയോടെ മരിച്ചത്.

കഴിഞ്ഞ ഡിസംബർ 29ന് രാവിലെ 7.45 ഓടെയായിരുന്നു അപകടം. തൃശൂരിലേക്ക് പോവുകയായിരുന്ന സ്വകാര്യ ബസ് ദേശീയപാതയിലെ ഒരു ബസ് സ്റ്റോപ്പിൽ ആളുകളെ ഇറക്കുന്നതിനായി എത്തുന്നതിനിടെയാണ് സംഭവം. മുൻഭാഗത്തെ ഡോർ തുറക്കുന്നതിനിടെ ജിബിൻ റോഡിലേക്ക് തെറിച്ചുവീഴുകയായിരുന്നു.

അപകടത്തിൽ തലയ്ക്ക് ഗുരുതരമായി പരിക്കേറ്റ ജിബിനെ ഉടൻതന്നെ ബസ് ജീവനക്കാർ ചേർന്ന് ആംബുലൻസിൽ ഇരട്ടക്കുളത്തെ സ്വകാര്യ ആശുപത്രിയിൽ പ്രവേശിപ്പിച്ചു. വിദഗ്ധ ചികിത്സ നൽകിയിരുന്നെങ്കിലും ആരോഗ്യനില വഷളാവുകയും ഇന്നലെ രാവിലെ 11 മണിയോടെ മരണം സംഭവിക്കുകയുമായിരുന്നു. ദേശീയപാതയിലുണ്ടായ ഈ ദാരുണമായ അപകടം പ്രദേശവാസികളിലും യാത്രക്കാരിലും ആശങ്ക ഉണർത്തിയിട്ടുണ്ട്.