വയോധികയുടെ മാല പൊട്ടിച്ച് കടന്നുകളയാൻ ശ്രമിച്ച കേസ്; പ്രതി പിടിയിൽ; കൃത്യത്തിന് പ്രേരിപ്പിച്ചത് ഓൺലൈൻ ട്രേഡിങ്ങുമായി ബന്ധപ്പെട്ട് ഉണ്ടായ സാമ്പത്തിക ഞെരുക്കം; സംഭവം എറണാകുളത്ത്
കരിമുഗൾ: വയോധികയുടെ മാല പൊട്ടിച്ച് കടന്നുകളയാൻ ശ്രമിച്ച യുവാവിനെ കുടുക്കിയത് പോലീസിന്റെ തന്ത്രപരമായ നീക്കം. ഇടപ്പള്ളി സമൃദ്ധി നഗറിൽ രാജേഷിനെയാണ് (38) അമ്പലമേട് പൊലീസ് അറസ്റ്റ് ചെയ്തത്. അമ്പലമേട് പൊലീസാണ് പ്രതിയെ പിടികൂടിയത്. സാമ്പത്തിക പ്രതിസന്ധികൾ കാരണമാണ് ഇയാൾ മോഷണ ശ്രമം നടത്തിയതെന്നാണ് വിവരം.
ബുധനാഴ്ച 1.45നാണ് സംഭവമുണ്ടായത്. കരിമുഗൾ സ്വദേശിനിയായ വയോധിക ബ്രഹ്മപുരം റോഡിലൂടെ മേച്ചിറപ്പാട്ട് ഭാഗത്തെ വീട്ടിലേക്ക് നടന്നുപോകും വഴി രാജേഷ് മാലപൊട്ടിച്ച് കടന്നുകളയാൻ ശ്രമിക്കുകയായിരുന്നു. തുടർന്ന് പോലീസ് നടത്തിയ അന്വേഷണത്തിൽ പ്രതി പിടിയിലാവുകയായിരുന്നു. ഓൺലൈൻ ട്രേഡിങ്ങുമായി ബന്ധപ്പെട്ട് ഇയാൾക്ക് സാമ്പത്തിക പ്രശ്നങ്ങൾ ഉണ്ടായിരുന്നു. ഇതാണ് കൃത്യം ചെയ്യാൻ പ്രേരിപ്പിച്ചതെന്നാണ് വിവരം. രാജേഷ് ബി.ടെക് ബിരുദധാരിയാണ്.
അമ്പലമേട് പൊലീസ് സ്റ്റേഷൻ സബ് ഇൻസ്പെക്ടർ എൻ. ബാബു, ജോസഫ്, അരുൺ, സീനിയർ സിവിൽ പൊലീസ് ഓഫിസർമാരായ സോണി, അൻസാർ, പ്രഭലാൽ, സിവിൽ പൊലീസ് ഓഫിസർമാരായ ഷിജുമോൻ, സി.എസ്. സുമേഷ് എന്നിവർ ചേർന്നാണ് പ്രതിയെ പിടികൂടിയത്. കോടതിയിൽ ഹാജരാക്കി റിമാൻഡ് ചെയ്തു.
