ചിക്കന്‍ കറിക്ക് ചൂട് കുറവ്; ഹോട്ടലുടമയെ സോഡാകുപ്പിയെടുത്ത് തലക്കടിച്ചു; മര്‍ദ്ദന സംഭവം അമരവിളയില്‍

തിരുവനന്തപുരം: ചിക്കന്‍ കറിക്ക് ചൂട് കുറഞ്ഞതിന്റെ പേരില്‍ ഹോട്ടല്‍ ഉടമക്ക് മര്‍ദ്ദനം. ഭക്ഷണം കഴിക്കാനെത്തിയ സംഘമാണ് ആക്രമിച്ചത്. സോഡാ കുപ്പിയെടുത്ത് തലക്കടിക്കുകയും ഹോട്ടലിന് പുറത്തേക്ക് വലിച്ചിറക്കി മര്‍ദിക്കുകയും ചെയ്തു.

നെയ്യാറ്റിന്‍കര അമരവിളയില്‍ കഴിഞ്ഞ ദിവസം രാത്രി പുഴയോരം എന്ന ഹോട്ടലിലാണ് സംഭവമുണ്ടായത്. ഇതിന്റെ ദൃശ്യങ്ങള്‍ പുറത്തുവന്നിട്ടുണ്ട്. ഹോട്ടലുടമ ദിലീപിനെ സംഘം കുപ്പി കൊണ്ട് തലക്കടിച്ച ശേഷം മാപ്പു പറയാനെന്ന് പറഞ്ഞ് പുറത്തേക്ക് വിളിച്ചു. ദിലീപ് വരാത്തതിനെ തുടര്‍ന്ന് പുറത്തേക്ക് വലിച്ചിറക്കി.

തുടര്‍ന്ന് ഹോട്ടലിന് മുന്നിലിട്ട് മര്‍ദിച്ചു. പരിക്കേറ്റ ദിലീപ് ആശുപത്രിയില്‍ ചികിത്സയിലാണ്. സംഭവത്തില്‍ നെയ്യാറ്റിന്‍കര പൊലീസില്‍ പരാതി നല്‍കി.