തിരുവനന്തപുരം: സിഐടിയു സംസ്ഥാന പ്രസിഡന്റായി ടി പി രാമകൃഷ്ണനെ തെരഞ്ഞെടുത്തു. സിഐടിയു പ്രസിഡന്റായിരുന്ന ആനത്തലവട്ടം ആനന്ദൻ അന്തരിച്ചതിനെ തുടർന്നാണ് പുതിയ പ്രസിഡന്റിനെ തെരഞ്ഞെടുത്തത്.
നിലവിൽ സിഐടിയു സംസ്ഥാന വൈസ് പ്രസിഡന്റും അഖിലേന്ത്യാ കമ്മിറ്റിയംഗവുമാണ്. വൈസ് പ്രസിഡന്റ് ജി മേഴ്‌സിക്കുട്ടിയമ്മയുടെ അധ്യക്ഷതയിൽ ചേർന്ന സംസഥാന കമ്മിറ്റിയാണ് പുതിയ പ്രസിഡന്റിനെ തെരഞ്ഞെടുത്തത്.
1968 ൽ സിപിഐ എം അംഗമായ ടി പി രാമകൃഷൻ നിലവിൽ സിപിഐ എം സംസ്ഥാന സെക്രട്ടേറിയറ്റ് അംഗമാണ്. ഒന്നാം പിണറായി സർക്കാരിൽ എക്‌സൈസ് , തൊഴിൽ മന്ത്രിയായിരുന്നു. 1970 മുതൽ ട്രേഡ് യൂണിയൻ മേഖലയിലും കാർഷിക തൊഴിലാളി സംഘടനയിലും സജീവമായി പ്രവർത്തിച്ചു. കീഴരിയൂർ ലോക്കൽ കമ്മിറ്റി അംഗം, കടിയങ്ങാട് ലോക്കൽ കമ്മിറ്റി സെക്രട്ടറി, ബാലുശ്ശേരി ഏരിയ സെക്രട്ടറി, കോഴിക്കോട് ജില്ലാ കമ്മിറ്റി അംഗം എന്നീ നിലകളിൽ പ്രവർത്തിച്ചു.
1981 മുതൽ ഒമ്പത് വർഷത്തോളം സിപിഎം പേരാമ്പ്ര ഏരിയ സെക്രട്ടറിയായിരുന്നു. പേരാമ്പ്രയിലെ പ്ലാന്റേഷൻ കോർപ്പറേഷന്റെ എസ്റ്റേറ്റിൽ യൂണിയൻ കെട്ടിപ്പടുക്കുന്നതിൽ നിർണായക പങ്ക് വഹിച്ചു.
