തിരുവല്ല: 1.70 ലക്ഷം രൂപ ബോക്സിൽ സൂക്ഷിച്ച ശേഷം താക്കോലുമിട്ട് ബാങ്കിന് മുന്നിൽ വച്ചിരുന്ന സ്‌കൂട്ടർ മോഷ്ടിച്ച കേസിലെ പ്രതിയെ അന്വേഷണ സംഘം പിടികൂടി. സ്‌കൂട്ടറും മോഷണം പോയതിൽ 1.24 ലക്ഷം രൂപയും തിരികെ കിട്ടി. ശേഷിച്ച തുക പ്രതി കൂട്ടുകാരുമൊത്ത് അടിച്ചു പൊളിച്ചു.

പൊടിയാടിയിൽ ബാങ്കിന് മുന്നിൽ താക്കോലിട്ട് വച്ചിരുന്ന സ്‌കൂട്ടറും പണവുമായി പണവുമായി കടന്ന മാന്നാർ പാവുക്കര ഇടയിലപ്പറമ്പിൽ വീട്ടിൽ പ്രവീൺ പൊടിയനാണ് (28) അറസ്റ്റിലായത്. ഏപ്രിൽ 10 ന് പൊടിയാടി ജങ്ഷന് സമീപം പ്രവർത്തിക്കുന്ന കാനറ ബാങ്കിന് മുമ്പിൽ നിന്നും ചിറപ്പറമ്പിൽ തോമസ് ഏബ്രഹാമി (ഷാജി) ന്റെ സ്‌കൂട്ടറാണ് മോഷ്ടിച്ചത്. സ്‌കൂട്ടറിന്റെ ബോക്സിൽ 1.70 ലക്ഷം രൂപയും ഉണ്ടായിരുന്നു. ബാങ്കിൽ അടയ്ക്കാൻ കൊണ്ടു വന്ന പണമായിരുന്നു ഇത്.

ബാങ്കിന് സമീപത്തെ കെട്ടിടത്തിലേത് അടക്കമുള്ള സിസിടിവി ദൃശ്യങ്ങൾ അടിസ്ഥാനമാക്കി നടത്തിയ അന്വേഷണത്തിലാണ് പ്രതി വലയിലായത്. ബാങ്കിലുണ്ടായിരുന്ന മകനെ തിരക്കി പോയ ഷാജി സ്‌കൂട്ടറിൽ നിന്നും താക്കോൽ എടുക്കാൻ മറന്നു. മകനെയും വിളിച്ച് പുറത്തേക്കിറങ്ങി വന്നപ്പോഴാണ് സ്‌കൂട്ടർ മോഷണം പോയ വിവരം അറിഞ്ഞത്. തുടർന്നാണ് പുളിക്കീഴ് പൊലീസിൽ പരാതി നൽകിയത്.

സിസിടിവിയിൽ നിന്നും ലഭിച്ച പ്രതിയുടെ ദൃശ്യങ്ങൾ പൊലീസ് സമീപ ജില്ലകളിലെ പൊലീസ് സ്റ്റേഷനുകളിലേക്ക് നൽകിയിരുന്നു. ഇതേ തുടർന്ന് പാലാരിവട്ടം പൊലീസ് സ്റ്റേഷൻ പരിധിയിൽ നിന്നും പ്രതി മോഷണം പോയ സ്‌കൂട്ടറിൽ സഞ്ചരിക്കുന്ന വ്യക്തതയുള്ള ദൃശ്യം ലഭിച്ചു. ഇത് അന്വേഷണ സംഘത്തിന് കൈമാറി. തുടർന്ന് ദൃശ്യങ്ങൾ വിവിധ പൊലീസ് സ്റ്റേഷനുകളിലേക്ക് അയച്ചു നൽകി.

മാന്നാർ പൊലീസ് ആണ് പ്രതിയെ തിരിച്ചറിഞ്ഞത്. അന്വേഷണ സംഘം പ്രതിയുടെ വീട്ടിൽ നടത്തിയ പരിശോധനയിൽ സ്‌കൂട്ടറും 1.24 ലക്ഷം രൂപയും കണ്ടെടുത്തു. ബാക്കി തുക സുഹൃത്തുക്കളുമൊത്ത് മദ്യപിക്കുന്നതിനും മറ്റ് ആവശ്യങ്ങൾക്കുമായി ചെലവഴിച്ചതായി പ്രതി പൊലീസിന് മൊഴി നൽകിയിട്ടുണ്ട്. എസ് ഐ മാരായ ജെ. ഷെജീം, ഷിജു പി സാം, എ എസ് ഐ അനിൽ എസ്.എസ്, സീനിയർ സി പി ഒമാരായ അഖിലേഷ്, പ്യാരിലാൽ, സി.പി.ഒ സുദീപ് എന്നിവർ അടങ്ങുന്ന സംഘമാണ് പ്രതിയെ പിടികൂടിയത്.

ശ്രീലാല്‍ വാസുദേവന്‍

    ശ്രീലാല്‍ വാസുദേവന്‍ മറുനാടന്‍ മലയാളി പത്തനംതിട്ട ന്യൂസ് കോണ്‍ട്രിബ്യൂട്ടര്‍