കെഎസ്ആർടിസി ബസ് പോലീസ് ജീപ്പിന്റെ സൈഡ് മിററിൽ തട്ടി; ഡ്രൈവറെ മർദിച്ചതായി പരാതി; കണ്ണിനും തലയ്ക്കും പരിക്ക്

കോട്ടയം: കെഎസ്ആർടിസി ബസ് പോലീസ് ജീപ്പിൽ തട്ടിയെന്നാരോപിച്ച് ഡ്രൈവറെ പോലീസ് മർദിച്ചതായി പരാതി. മൂന്നാർ-ആലപ്പുഴ ലിമിറ്റഡ് സ്റ്റോപ്പ് ബസ് ഡ്രൈവർ പി.കെ. വേലായുധനാണ് മർദനമേറ്റത്. പരിക്കേറ്റ ഡ്രൈവർ വൈക്കം സർക്കാർ ആശുപത്രിയിൽ ചികിത്സ തേടി.

ബുധനാഴ്ച രാവിലെയാണ് സംഭവം നടന്നത്. ആലപ്പുഴയിലേക്കുള്ള സർവീസിനിടെ ഉല്ലലക്ക് സമീപത്തുവെച്ചാണ് സംഭവം ഉണ്ടായതെന്ന് വേലായുധൻ പറഞ്ഞു. പോലീസ് ജീപ്പിന്റെ സൈഡ് മിററിൽ ബസ് തട്ടിയെന്നാരോപിച്ച് അസഭ്യം പറയുകയും മർദിക്കുകയും ചെയ്തതായി ഇദ്ദേഹം പരാതിയിൽ പറയുന്നു. സംഭവത്തിൽ കണ്ണിനും തലയ്ക്കും പരിക്കേറ്റിട്ടുണ്ട്.