കൺമുന്നിൽ വെച്ച് കുളിക്കാനിറങ്ങിയ കുട്ടി ഒഴുക്കില്‍പ്പെട്ടു; ഒന്നും നോക്കാതെ രക്ഷിക്കാൻ എടുത്തുചാടിയ യുവാവിന് ദാരുണാന്ത്യം; സംഭവം തൃശൂരിൽ

തൃശ്ശൂർ: ചാലക്കുടി പുഴയിലെ അറങ്ങാലിക്കടവിൽ കുളിക്കാനിറങ്ങിയ 30 വയസ്സുകാരൻ ഒഴുക്കിൽപ്പെട്ട കുട്ടിയെ രക്ഷിക്കാൻ ശ്രമിക്കുന്നതിനിടെ മുങ്ങി മരിച്ചു. പാറക്കടവ് പഞ്ചായത്തിലെ എളവൂർ സ്വദേശി കൊടുമ്പിള്ളി വീട്ടിൽ ജോഷിയുടെ മകൻ കൃഷ്ണൻ (30) ആണ് മരിച്ചത്.

ഞായറാഴ്ച ഉച്ചയ്ക്ക് 12.30 ഓടെയായിരുന്നു ദാരുണമായ സംഭവം. കുടുംബ സുഹൃത്തുക്കളായ ആറംഗ സംഘത്തോടൊപ്പമാണ് കൃഷ്ണൻ അറങ്ങാലിക്കടവിൽ കുളിക്കാനെത്തിയത്.

ഇതിനിടെ സംഘത്തിലെ ഒമ്പത് വയസ്സുകാരനായ കുട്ടി പുഴയിലെ ശക്തമായ ഒഴുക്കിൽപ്പെട്ടു. കുട്ടിയെ രക്ഷിക്കാനായി കൃഷ്ണൻ ഉടൻ തന്നെ പുഴയിലേക്ക് ചാടുകയായിരുന്നു. എന്നാൽ, രക്ഷാപ്രവർത്തനത്തിനിടെ കൃഷ്ണൻ ഒഴുക്കിൽപ്പെട്ട് അപകടത്തിൽപ്പെട്ടു.

സംഭവം ശ്രദ്ധയിൽപ്പെട്ട ഉടൻ തന്നെ സ്ഥലത്തുണ്ടായിരുന്ന നാട്ടുകാർ കൃഷ്ണനെ കരയ്ക്ക് എത്തിച്ച് ഉടൻ ആശുപത്രിയിലേക്ക് കൊണ്ടുപോയെങ്കിലും, യാത്രാമധ്യേ മരണം സംഭവിക്കുകയായിരുന്നു.