കൊറിയർ വഴി എംഡിഎംഎ കടത്ത്; രണ്ടു യുവാക്കൾ പത്തനംതിട്ടയിൽ പിടിയിൽ; രാസലഹരി എത്തിച്ചത് ഇലക്‌ട്രോണിക്സ് എക്സ്റ്റൻഷൻ ബോർഡിൽ ഒളിപ്പിച്ച നിലയിൽ
പത്തനംതിട്ട: കൊറിയർ സർവീസ് വഴി എംഡിഎംഎ കടത്തിയ രണ്ടു യുവാക്കളെ പൊലീസ് അറസ്റ്റ് ചെയ്തു. അഴൂർ മാലേത്ത് നിഖിൽ (28), അഴൂർ തെങ്ങുംചേരിൽ ജിത്ത് എന്ന് വിളിക്കുന്ന ജി. അഭിജിത് (23) എന്നിവരാണ് പിടിയിലായത്.
സ്റ്റേഡിയം ജങ്ഷനിൽ പത്മ കഫെയ്ക്ക് എതിർവശം പ്രവർത്തിക്കുന്ന ഡി ടി ഡി സി കൊറിയർ സർവീസ് സെന്ററിൽ എക്സ്റ്റൻഷൻ ബോർഡിൽ ഒളിപ്പിച്ച നിലയിലാണ് എംഡിഎംഎ ബാംഗളുരുവിൽ നിന്നും എത്തിച്ചത്. പ്ലാസ്റ്റിക് കവർ ഉൾപ്പെടെ ആറു ഗ്രാം തൂക്കം വരുന്ന പൊതിക്കുള്ളിൽ 4.5 ഗ്രാം എം ഡി എം എ ആണുള്ളത്. നിഖിലിന്റെ വിലാസത്തിലാണ് രാസലഹരിമരുന്ന് എത്തിയത്.
ജില്ലാ പൊലീസ് മേധാവിക്ക് ലഭിച്ച രഹസ്യവിവരത്തിന്റെ അടിസ്ഥാനത്തിലാണ് ഡിവൈ.എസ്‌പി എസ്. നന്ദകുമാറിന്റെ നേതൃത്വത്തിൽ റെയ്ഡ് നടത്തിയതു എംഡിഎംഎ കണ്ടെത്തിയതും. നർകോട്ടിക് സെൽ ഡി വൈ എസ് പി കെ എ വിദ്യാധരനും പരിശോധനയിൽ പങ്കെടുത്തു. പത്തനംതിട്ട പൊലീസ് ഇൻസ്പെക്ടർ ജിബു ജോണിന്റെ നേതൃത്വത്തിൽ തുടർ നടപടി സ്വീകരിച്ചു.
