വിളക്കിൽ നിന്നും തീ പടർന്നു; തിരുവനന്തപുരത്ത് ഇലക്ട്രോണിക് സർവീസ് ഷോപ്പിൽ വൻ തീപിടുത്തം; ഉടമ പുറത്തുപോയതുകൊണ്ട് വൻ അപകടം ഒഴിവായി; ഒരു ലക്ഷം രൂപയുടെ നഷ്ടം

തിരുവനന്തപുരം: ഇലട്രിക് ഷാേപ്പിൽ വൻ തീപിടുത്തം. കാഞ്ഞിരംപാറ ജങ്ഷനിൽ പ്രവർത്തിക്കുന്ന തേക്കുമ്മൂട് സ്വദേശി പ്രദീപിൻ്റെ ഇലക്ട്രോണിക് ഉപകരണങ്ങളുടെ സർവീസ് സെൻ്ററിലാണ് ഉച്ചയോടെ വലിയ തീപിടുത്തം ഉണ്ടായത്. കടയിൽ തെളിയിച്ചിരുന്ന വിളക്കിൽ നിന്നും തീ ആളിക്കത്തിയതാണ് അപകടകാരണമെന്ന് ഫയർഫോഴ്സ് പ്രവർത്തകർ അറിയിച്ചു. ഈ സമയം ഉടമ പുറത്തു പോയിരുന്നു.

12 മണിയോടെ തീ പടർന്നത് കണ്ട സമീപവാസികൾ അറിയിച്ചതിനെത്തുടർന്ന് ഫയർഫോഴ്സ് സംഘം സ്ഥലത്തെത്തി ഒരു മണിക്കൂർ പ്രയത്നിച്ച ശേഷമാണ് തീ നിയന്ത്രണ വിധേയമാക്കാനായത്. റിപ്പയറിങ്ങിനായി എത്തിച്ച നാല് ഫ്രിഡ്ജ്, ഒരു എസി, രണ്ട് വാഷിങ് മെഷീൻ തുടങ്ങിയവ കത്തിനശിച്ചു. ഏകദേശം ഒരു ലക്ഷം രൂപയുടെ നഷ്ടം ഉണ്ടായതായി ഉടമ പറയുന്നു. തിരുവനന്തപുരം യൂണിറ്റിൽ നിന്നും രണ്ട് വണ്ടി എത്തിയാണ് തീ ഒടുവിൽ നിയന്ത്രണ വിധേയമാക്കിയത്.