മണ്ണാർക്കാട്: കരിമ്പ ഇടക്കുറുശി ശിരുവാണി ജങ്ഷനടുത്ത് മരംപിടിക്കാൻ കൊണ്ടുവന്ന ആനയെ കാട്ടാനക്കൂട്ടം ആക്രമിച്ചു. നാട്ടാനയ്ക്ക് ഗുരുതര പരിക്കേറ്റു. വെള്ളി അർധരാത്രിക്ക് ശേഷമാണ് ആക്രമണം. മലപ്പുറം അരീക്കോട് കൊളക്കാടൻ മഹാദേവൻ എന്ന കൊമ്പനാണ് പരിക്കേറ്റത്. മരംപിടിക്കാനെത്തിച്ച് തമ്പുരാൻചോല പൂഴിക്കുന്നിൽ തളച്ചിട്ടിരുന്ന മഹാദേവനെ മൂന്ന് കാട്ടാനകൾ തുരുതുരാ കുത്തുകയായിരുന്നു.

ആനയുടെ കണ്ണിനുതാഴെയും കാലിലും ചെവിക്കും പരിക്കേറ്റിട്ടുണ്ട്. രാത്രി ഒന്നിന് ആനകൾ കൂട്ടമായി വരുന്ന ദൃശ്യം സമീപത്തെ വീട്ടിലെ സിസിടിവിയിൽനിന്ന് വ്യക്തമാണ്. ആർആർടി സംഘം സ്ഥലത്തെത്തിയാണ് ആനക്കൂട്ടത്തെ വനത്തിനകത്തേക്ക് തുരത്തിയത്. സംഭവ സമയത്ത് പാപ്പാൻ സ്ഥലത്ത് ഉണ്ടായിരുന്നു.

കഴിഞ്ഞ ദിവസങ്ങളിൽ പലവട്ടം ഈ മേഖലയിൽ കൃഷിയിടങ്ങളിലേക്ക് ആന ഇറങ്ങിയിരുന്നു. വനമേഖല പിന്നിട്ട് ദേശീയപാതയ്ക്കരികിൽ ആനകൾ എത്തിയ സാഹചര്യത്തിൽ സുരക്ഷ ഒരുക്കണമെന്ന് നാട്ടുകാർ പറഞ്ഞു.

 

ആക്രമണംകാട്ടാനകൂട്ടം