തെലുങ്ക് സിനിമാ ഷൂട്ടിംഗിന് എത്തിച്ച ആനകള്‍ തമ്മില്‍ ഏറ്റുമുട്ടി; കൊമ്പു കോര്‍ത്തത് പുതുപ്പള്ളി സാധുവും തടത്താവിള മണികണ്ഠന്‍ തമ്മില്‍; വെള്ളിത്തിരയെ വെല്ലുന്ന സംഘട്ടനം വിജയ് ദേവരകൊണ്ട ചിത്രത്തിന്റെ ഷൂട്ടിങ്ങിന് എത്തിച്ചപ്പോള്‍

കൊച്ചി: കോതമംഗലത്ത് തെലുങ്ക് സിനിമ ഷൂട്ടിങിന് എത്തിച്ച നാട്ടാകള്‍ തമ്മില്‍ ഏറ്റമുട്ടി. പുതുപ്പള്ളി സാധു, തടത്താവിള മണികണ്ഠന്‍ എന്നീ ആനകള്‍ തമ്മിലാണ് ഏറ്റുമുട്ടിയത്. കൊമ്പന്‍മാര്‍ കൊമ്പുകോര്‍ത്തതോടെ കുത്തേറ്റ പുതുപ്പള്ളി സാധു എന്ന ആന കാടുകയറി. ആനയെ തിരിച്ചിറക്കാനുള്ള ശ്രമം തുടരുകയാണ്.

തെലുങ്ക് സൂപ്പര്‍താരം വിജയ് ദേവരകൊണ്ട നായകനായെത്തുന്ന പുതിയ ചിത്രത്തിന്റെ ഷൂട്ടിങ്ങിന് എത്തിച്ചതായിരുന്നു ആനകളെ. റിസര്‍വ് ഫോറസ്റ്റിലേക്ക് കയറിപ്പോയ ആനയെ കണ്ടെത്താനായി വനം വകുപ്പ് ഉദ്യോഗസ്ഥരും പാപ്പാന്‍മാരും റിസര്‍വ് ഫോറസ്റ്റിലേക്ക് പോയി.

പുതുപ്പള്ളി സാധുവിനോട് ഏറ്റുമുട്ടിയ മറ്റൊരു ആന കാട്ടിലേക്ക് കയറിയെങ്കിലും പിന്നീട് തിരിച്ച് വന്നു. ഈ ആനയ്ക്ക് കാര്യമായ പരിക്കേറ്റിട്ടില്ല. മൂന്ന് പിടിയാനയെയും രണ്ടു കൊമ്പനാനകളെയുമാണ് ഷൂട്ടിങ്ങിന് എത്തിച്ചത്. ഒരാഴ്ചയായി വടാട്ടുപാറയില്‍ ഷൂട്ടിംഗ് നടക്കുന്നുണ്ട്. മറ്റ് ആനകളെ വാഹനത്തില്‍ കയറ്റി തിരികെ കൊണ്ടുപോയി.