പാലക്കാട്: തൃത്താലയിൽ സ്‌കൂൾ പരിസരത്ത് മാലിന്യം കത്തിക്കുന്നതിനിടെ വിദ്യാർത്ഥിക്ക് പൊള്ളലേറ്റു. കുമരനെല്ലൂർ ഹയർസെക്കൻഡറി സ്‌കൂളിലെ എട്ടാം ക്ലാസ് വിദ്യാർത്ഥി അഭിനവിനാണ് പൊള്ളലേറ്റത്. സ്‌കൂൾ പരിസരത്തെ മാലിന്യം കൂട്ടിയിട്ട് കത്തിക്കുന്നതിനിടെയായിരുന്നു അപകടം. മാലിന്യം കത്തിക്കുന്നതിനിടെ പൊട്ടിത്തെറി ഉണ്ടാവുകയും അഭിനവിന്റെ ശരീരത്തിലേക്ക് തീ പടരുകയുമായിരുന്നു. വെള്ളിയാഴ്ചയാണ് സംഭവം ഉണ്ടായത്.
നവംബറിൽ സ്‌കൂളിൽ ഉപജില്ല കായികമേള നടന്നിരുന്നു. കായികമേളയ്ക്ക് ശേഷം മാലിന്യങ്ങൾ കൂട്ടിവെച്ചിരുന്നു. അഞ്ച് മുതൽ പത്ത് വരെയുള്ള ക്ലാസിലെ കുട്ടികളെ കൂട്ടി അദ്ധ്യാപകർ ആ മാലിന്യം കത്തിക്കുന്നതിനിടെയാണ് പൊട്ടിത്തെറി ഉണ്ടായത്. അഭിനവിനെ ഉടൻ തന്നെ എടപ്പാളിലെ സ്വകാര്യ ആശുപത്രിയിലേക്ക് കൊണ്ടുപോയി. ചികിത്സയ്ക്ക് ശേഷം കുട്ടിയെ വീട്ടിലേക്ക് അയച്ചു. കുട്ടിയുടെ ആരോഗ്യനില തൃപ്തികരമാണ്.
സംഭവത്തിന് പിന്നാലെ കുട്ടികളെ സ്‌കൂളിൽ പണിയെടുപ്പിച്ചതിനെതിരെ രക്ഷിതാക്കൾ രംഗത്തെത്തി. എന്നാൽ, കുട്ടികളെ പണിയെടുപ്പിച്ചതല്ല മറിച്ച് ശുചിത്വവത്കരണത്തിന്റെ ഭാഗമായി വിദ്യാർത്ഥികളെ ഒപ്പം കൂട്ടിയാണെന്ന് അദ്ധ്യാപകർ അറിയിച്ചു.
