ആദ്യം കറുത്ത പുക ഉയര്‍ന്നു; പിന്നാലെ വലിയ ശബ്ദത്തിൽ പൊട്ടിത്തെറി; അടുക്കളയിൽ വില്ലനായത് ഫ്രിഡ്ജ്; വ്യാപക നാശനഷ്ടം; ഒഴിവായത് വൻ അപകടം
തിരുവനന്തപുരം: വീട്ടിലെ ഫ്രിഡ്ജ് പൊട്ടിത്തെറിച്ച് വൻ അപകടം. തിരുവനന്തപുരം കാര്യവട്ടത്താണ് സംഭവം നടന്നത്. വലിയ ശബ്ദത്തോടെ ഫ്രിഡ്ജ് പൊട്ടിത്തെറിച്ചതോടെ അടുക്കളയിലെ ടൈൽസും കബോര്‍ഡുകളുമടക്കം എല്ലാം തകർന്നു. ഇതോടെ അടുക്കള ഭാഗം പൂര്‍ണമായും കത്തിനശിക്കുകയും ചെയ്തു.
സംഭവം നടക്കുമ്പോള്‍ വീട്ടിൽ ഉണ്ടായിരുന്നവർ പുറത്തിറങ്ങിയതിനാൽ വലിയ അപകടം ഒഴിവായി. തിരുവനന്തപുരം കാര്യവട്ടം കാമ്പസിലെ വിദ്യാര്‍ത്ഥികള്‍ വാടകയ്ക്ക് എടുത്ത് താമസിക്കുന്ന വീട്ടിൽ ഇന്ന് ഉച്ചയ്ക്ക് ഒരുമണിയോടെയാണ് സംഭവം നടന്നത്. കുട്ടികൾ പാചകം ചെയ്യുന്നതിനിടെ ഫ്രിഡ്ജിനുള്ളിൽ നിന്ന് പുക ഉയരുന്നതു കണ്ടു.
ഇതോടെ ഉടനെ തന്നെ ഇവർ പുറത്തിറങ്ങി വീട്ടിലെ വൈദ്യുതി ബന്ധം വിച്ഛേദിക്കുകയായിരുന്നു. പുക ഉയര്‍ന്നതിന് പിന്നാലെ ഫ്രിഡ്ജ് പൊട്ടിത്തെറിച്ചു. ഇതോടെ അടുക്കളയിലേക്ക് തീപടര്‍ന്നു. അടുക്കളയിലെ ടൈൽസും മറ്റു സാധനങ്ങളുമെല്ലാം തകര്‍ന്നു. കഴക്കൂട്ടത്തുനിന്നെത്തിയ അഗ്നിരക്ഷാസേനയാണ് തീ അണച്ചത്.
