പോലീസിനെ കണ്ട് പരുങ്ങൽ; പരിശോധനയിൽ പിടിച്ചെടുത്തത് ചില്ലറ വിൽപ്പനയ്ക്കായി സൂക്ഷിച്ചിരുന്ന കഞ്ചാവ്; യുവാവ് പിടിയിൽ

ചെങ്ങന്നൂർ: ചില്ലറ വിൽപ്പനയ്ക്കായി സൂക്ഷിച്ചിരുന്ന കഞ്ചാവുമായി യുവാവ് പിടിയിൽ. കോഴിക്കോട് കുന്നമംഗലം താലൂക്കിൽ കൊടിയത്തൂർ സ്വദേശിയായ നോണ്ടത്ത് ചാത്തപ്പറമ്പിൽ അംജത് ഖാൻ (30) ആണ് അറസ്റ്റിലായത്. 1116 ഗ്രാം കഞ്ചാവാണ് ഇയാളിൽ നിന്നും ചെങ്ങന്നൂർ പോലീസ് പിടിച്ചെടുത്തത്. ചെങ്ങന്നൂർ കെ.എസ്.ആർ.ടി.സി. ബസ് സ്റ്റാൻഡിന് സമീപത്ത് നിന്ന് ഇയാളെ പോലീസ് പിടികൂടിയത്.

പ്രതിയുടെ കൈവശമുണ്ടായിരുന്ന ബാഗിൽ നിന്നാണ് കഞ്ചാവ് കണ്ടെടുത്തത്. ആവശ്യക്കാർക്ക് ചില്ലറയായി വിൽപ്പന നടത്താനാണ് കഞ്ചാവ് സൂക്ഷിച്ചിരുന്നതെന്ന് പ്രതി സമ്മതിച്ചു. ഇയാൾ സഞ്ചരിച്ച കൊടുവള്ളി രജിസ്ട്രേഷനിലുള്ള മോട്ടോർസൈക്കിളും പോലീസ് കസ്റ്റഡിയിലെടുത്തു. രാത്രികാല പെട്രോളിംഗിനിടെയാണ് പോലീസ് സംഘത്തിന് ഇയാളെക്കുറിച്ച് സംശയം തോന്നിയത്.

തുടർന്ന് നടത്തിയ പരിശോധനയിലാണ് കഞ്ചാവ് കണ്ടെത്തിയത്. ചെങ്ങന്നൂർ ഭാഗത്ത് കഞ്ചാവ് വിൽപ്പന നടത്തുന്നതിനായി കഴിഞ്ഞ രണ്ടാഴ്ചയായി പ്രതി തിരുവൻവണ്ടൂർ ഭാഗത്ത് വീട് വാടകയ്ക്കെടുത്ത് താമസിച്ചു വരികയായിരുന്നുവെന്ന് പോലീസ് അറിയിച്ചു.പ്രതിയെ കോടതിയിൽ ഹാജരാക്കി റിമാൻഡ് ചെയ്തു. സബ് ഇൻസ്പെക്ടർ പ്രദീപിന്റെ നേതൃത്വത്തിലുള്ള സംഘമാണ് പ്രതിയെ പിടികൂടിയത്.