മലപ്പുറം വളാഞ്ചേരിയിൽ വീട്ടിൽ വൻ കവർച്ച; നഷ്ടമായത് പത്തു പവൻ സ്വർണ്ണവും എഴുപത്തയ്യായിരം രൂപയും; കവർച്ചയ്ക്കു പിന്നിൽ പരിചയമുള്ളവരെന്ന് സംശയം

മലപ്പുറം: മലപ്പുറം വളാഞ്ചേരി പാണ്ടികശാലയിൽ വീട്ടിൽ കവർച്ച. പത്തുപവൻ സ്വർണ്ണവും എഴുപത്തയ്യായിരം രൂപയും കവർന്നു. സംഭവത്തിൽ പൊലിസ് അന്വേഷണം തുടങ്ങി. കഴിഞ്ഞ ദിവസം പുലർച്ചെയോടെ പാണ്ടികശാല താഴേ അങ്ങാടിയിൽ താമസിക്കുന്ന സുകുമാരന്റെ വീട്ടിലാണ് കവർച്ച നടന്നത്. മുറിയിൽ സൂക്ഷിച്ചിരുന്ന ബാഗിലാണ് സ്വർണവും പണവും സൂക്ഷിച്ചിരുന്നത്.

വീടിന് പുറകുവശത്ത് ബാഗ് ഉപേക്ഷിച്ചിരുന്നു. ഇത് കണ്ട് സംശയം തോന്നി പരിശോധിച്ചപ്പോഴാണ് മോഷണം നടന്നത് അറിയുന്നത്. മറ്റൊന്നും നശിപ്പിക്കുകയോ തിരച്ചിൽ നടത്തിയതിന്റെ ലക്ഷണങ്ങളോ ഇല്ല. പരിചയമുള്ളവരാവാം കവർച്ചയ്ക്കു പിന്നിലെന്നാണ് സംശയം.
സമീപ ദിവസങ്ങളിൽ വീട്ടിലെത്തിയവരെ ചോദ്യം ചെയ്തേക്കും.

വളാഞ്ചേരി പൊലീസാണ് കേസ് അന്വേഷിക്കുന്നത്. ഡോഗ് സ്‌ക്വാഡും വിരലടയാള വിദഗ്ധരും വീട്ടിലെത്തി പരിശോധന നടത്തി. ഡോഗ് സ്‌ക്വാഡിനും കൂടുതൽ വിവരങ്ങളൊന്നും ലഭിച്ചില്ല. സമീപത്തെ നിരീക്ഷണ ക്യാമറ ദൃശ്യങ്ങളും പൊലിസ് പരിശോധിക്കും.