തിരുവനന്തപുരം:ട്രാഫിക് സിഗ്‌നലിൽ ഹോണടിച്ചെന്നാരോപിച്ച് നടുറോഡിൽ യാത്രക്കാരന് നേരെ യുവാക്കളുടെ ആക്രമണം.ചൊവ്വാഴ്ച വൈകിട്ട് തിരുവനന്തപുരം നീറമൺകരയിലാണ് സംഭവം.കൃഷി വകുപ്പ് ഉദ്യോഗസ്ഥനായ നെയ്യാറ്റിൻകര സ്വദേശി പ്രദീപിനെയാണ് രണ്ട് യുവാക്കൾ ചേർന്ന് മർദ്ദിച്ചത്.ട്രാഫിക്ക് സിഗ്നലിലുണ്ടായ സംഭവത്തിന്റെ ദൃശ്യങ്ങൾ പുറത്ത് വന്നിരുന്നു.സംഭവം നടക്കുന്ന സമയത്ത് നീറമൺകരയിൽ വലിയ രീതിയിലുള്ള ഗതാഗതക്കുരുക്കുണ്ടായിരുന്നു.

യുവാക്കളുടെ ആക്രമണത്തിൽ മുഖത്താണ് പ്രദീപിന് ഗുരുതരമായി പരിക്കേറ്റിരിക്കുന്നത്.വായിൽ മൂന്ന് സ്റ്റിച്ചുണ്ട്. എന്നാൽ ഗതാഗത കുരുക്കിനെ തുടർന്ന് പ്രദീപിന്റെ വാഹനത്തിന് പുറകിലുള്ളവർ ഹോൺ മുഴക്കിയതാണ് പ്രശ്‌നങ്ങൾക്ക് കാരണമായത്. പ്രദീപാണ് ഇത് ചെയ്തതെന്ന് ആരോപിച്ചായിരുന്നു തൊട്ടുമുന്നിലുണ്ടായിരുന്ന ബൈക്കിലെ യുവാക്കൾ ഇറങ്ങി വന്ന് മർദിച്ചത്.

'ബ്ലോക്കിന്റെ ഇടയിൽ കൂടി കയറി പോകടാ' എന്ന് ആക്രോശിച്ചുകൊണ്ടാണ് ഇവർ തന്നെ മർദ്ദിച്ചതെന്നും തുടർന്ന് രണ്ടുപേരും ബൈക്കിൽ കയറി പോയെന്നും പ്രദീപ് പറഞ്ഞു,കരമന പൊലീസിൽ പരാതി നൽകിയെങ്കിലും ഇതുവരെ പ്രതികളെ കണ്ടെത്താനായിട്ടില്ല.

മറുനാടന്‍ മലയാളി

    മറുനാടന്‍ മലയാളി ബ്യൂറോ