ഭാര്യയെ കാറിടിച്ചു കൊലപ്പെടുത്താന്‍ ശ്രമം; ഭര്‍ത്താവ് അറസ്റ്റില്‍: അപകടത്തില്‍: കാലൊടിഞ്ഞ യുവതി ആശുപത്രിയില്‍

കൊല്ലം: ഭാര്യയെ കാറിടിച്ചു കൊലപ്പെടുത്താന്‍ ശ്രമിച്ചെന്ന പരാതിയില്‍ ഭര്‍ത്താവിനെ പോലിസ് അറസ്റ്റ് ചെയ്തു. ചെറുവക്കല്‍ കൂലിക്കോട് ഇടയിലരത്ത് വീട്ടില്‍ പ്രകാശ് (47) ആണ് അറസ്റ്റിലായത്. ഇന്നലെ വൈകിട്ടു മദ്യപിച്ചെത്തിയ പ്രകാശ് ഡോറുകള്‍ ഇളക്കിമാറ്റിയ കാറില്‍ അമിതവേഗത്തില്‍ ഭാര്യയുടെ വീടിന്റെ ഗേറ്റ് ഇടിച്ചു തകര്‍ത്തുവെന്നും ഭാര്യയെ ഇടിച്ചു കൊലപ്പെടുത്താന്‍ ശ്രമിച്ചെന്നാണു പരാതി.

ഇടിയുടെ ആഘാതത്തില്‍ കാലൊടിഞ്ഞ ഭാര്യയെ കൊല്ലം ഗവ.മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. കഴിഞ്ഞ ദിവസവും ഇയാള്‍ സമാന രീതിയില്‍ കാറോടിച്ചു പ്രദേശത്തു ഭീകരാന്തരീക്ഷം സൃഷ്ടിച്ചതായും പരാതിയുണ്ട്. ഭാര്യയെ സ്ഥിരമായി മര്‍ദിക്കാറുണ്ടെന്നും പൊലീസ് പറഞ്ഞു.