അത് ശരി...തെരഞ്ഞെടുപ്പിൽ 'ആറ്റുകാൽ അമ്മ' മത്സരിക്കുന്നുണ്ടോ?; ഫ്ലക്സ് ബോർഡുകൾക്കെതിരെ ആഞ്ഞടിച്ച് ഹൈക്കോടതി; സ്പോണ്സര്മാരുടെ മുഖം കാണാനാണോ എന്നും നിരീക്ഷണം
തിരുവനന്തപുരം: തലസ്ഥാന നഗരിയിൽ ആറ്റുകാൽ പൊങ്കാലയുമായി ബന്ധപ്പെട്ട് സ്ഥാപിച്ചിരിക്കുന്ന അനധികൃത ഫ്ലക്സ് ബോർഡുകൾക്കെതിരെ ഹൈക്കോടതിയുടെ രൂക്ഷവിമർശനം. ഈ ബോർഡുകൾ ഉടൻ എടുത്തുമാറ്റണമെന്ന് കോടതി കർശന നിർദേശം നൽകി. "ആറ്റുകാൽ അമ്മ തെരഞ്ഞെടുപ്പിന് മത്സരിക്കുന്നുണ്ടോ?" എന്ന് ചോദിച്ച കോടതി, സ്പോൺസർമാരുടെ മുഖങ്ങൾ കാണിക്കാനാണ് ഇത്തരം ബോർഡുകൾ സ്ഥാപിക്കുന്നതെന്നും നിരീക്ഷിച്ചു.
അനധികൃത ഫ്ലക്സ് ബോർഡുകളുമായി ബന്ധപ്പെട്ട ഒരു ഹർജി പരിഗണിക്കവെയാണ് ഹൈക്കോടതിയുടെ ഈ ചോദ്യങ്ങളും നിരീക്ഷണങ്ങളും. നഗരസൗന്ദര്യത്തെയും നിയമങ്ങളെയും വെല്ലുവിളിച്ച് അനധികൃത ബോർഡുകൾ വ്യാപകമാവുന്ന സാഹചര്യത്തിലാണ് കോടതിയുടെ ശക്തമായ ഇടപെടൽ.
ഹൈക്കോടതിയുടെ ഈ നിർദേശങ്ങൾക്കിടയിലും, ആറ്റുകാൽ പൊങ്കാല മഹോത്സവത്തിനുള്ള ഒരുക്കങ്ങൾ നഗരത്തിൽ ഏറെക്കുറെ പൂർത്തിയായിട്ടുണ്ട്. ലക്ഷക്കണക്കിന് ഭക്തജനങ്ങൾ പങ്കെടുക്കുമെന്ന് പ്രതീക്ഷിക്കുന്ന പൊങ്കാലയുടെ പ്രധാന ദിവസമായ മാർച്ച് 3-ന് തിരുവനന്തപുരം ജില്ലയിലെ എല്ലാ വിദ്യാഭ്യാസ സ്ഥാപനങ്ങൾക്കും സർക്കാർ, അർദ്ധ സർക്കാർ സ്ഥാപനങ്ങൾക്കും ജില്ലാ കളക്ടർ പ്രാദേശിക അവധി പ്രഖ്യാപിച്ചിട്ടുണ്ട്.
