അനധികൃതമായി സൂക്ഷിച്ച വന്‍ അളവിലെ സ്പിരിറ്റും കള്ളും പിടികൂടി; പിടികൂടിയത് 446 ലിറ്റര്‍ സ്പിരിറ്റും, പിക്കപ്പ് വാനില്‍ സൂക്ഷിച്ച 360 ലിറ്റര്‍ കള്ളും; സംഭവത്തില്‍ രണ്ട് പേരെ എക്സൈസ് പിടികൂടി
ചിറ്റൂര്‍: ചിറ്റൂര്‍ എക്സൈസ് സര്‍ക്കിളും പാലക്കാട് എക്സൈസ് സ്‌ക്വാഡും സംയുക്തമായി നടത്തിയ പരിശോധനയില്‍ അനധികൃതമായി സൂക്ഷിച്ച വന്‍ അളവിലെ സ്പിരിറ്റും കള്ളും പിടികൂടി. പെരുമാട്ടി മല്ലന്‍ചള്ള സ്വദേശിയായ നാനേഷ് (32), കോരയാര്‍ചള്ള സ്വദേശി എ. രാധാകൃഷ്ണന്‍ (40) എന്നിവരാണ് കേസിലെ പ്രതികള്‍. ഇവരില്‍നിന്ന് 446 ലിറ്റര്‍ സ്പിരിറ്റും, പിക്കപ്പ് വാനില്‍ സൂക്ഷിച്ച 360 ലിറ്റര്‍ കള്ളും പിടികൂടി.
രഹസ്യവിവരത്തെ തുടര്‍ന്നാണ് ഞായറാഴ്ച പുലര്‍ച്ചെ നാല് മണിയോടെ എക്സൈസ് സംഘം നാനേഷിന്റെ വീട്ടില്‍ എത്തി പരിശോധന നടത്തിയത്. വീട്ടിനോട് ചേര്‍ന്ന് നിര്‍ത്തിയിരുന്ന വാനില്‍ കള്ള് സൂക്ഷിച്ചിരുന്നതും, വീടിനകത്ത് 15 കന്നാസുകളിലായി സ്പിരിറ്റ് ഉള്ളതായും കണ്ടെത്തി.
പുലര്‍ച്ചെ തുടങ്ങിയ റെയ്ഡില്‍ ചിത്തൂര്‍ എക്സൈസ് ഇന്‍സ്പെക്ടര്‍ വി. രജനീഷ് നേതൃത്വം വഹിച്ചു. പാലക്കാട് എക്സൈസ് ഇന്‍സ്പെക്ടര്‍ സജിത്തും അസിസ്റ്റന്റ് ഇന്‍സ്പെക്ടര്‍ ജിഷു ജോസഫും ഉള്‍പ്പെടെ പ്രിവന്റീവ് ഓഫീസര്‍മാരായ സുജീഷ്, മധുസൂദനന്‍, ടി.സി. സജീവ്, എം. ജോസ് പ്രകാശ് എന്നിവരും സംഘത്തിലുണ്ടായിരുന്നു.
നാനേഷ് ചെത്തുതൊഴിലാളിയാണെന്ന് കണ്ടെത്തിയിട്ടുണ്ടെങ്കിലും, രാധാകൃഷ്ണന്‍ കൊല്ലം ശാസ്താംകോട്ട ഗ്രൂപ്പ് രണ്ടില്‍ ഉള്‍പ്പെട്ട ഷാപ്പിന്റെ ലൈസന്‍സിയാണെന്ന് എക്സൈസ് ഉദ്യോഗസ്ഥര്‍ വ്യക്തമാക്കി. മാവേലിക്കര ഗ്രൂപ്പ് നാല് ഉള്‍പ്പെടെയുള്ള ഷാപ്പുകളിലേക്ക് പോകുന്ന കള്ളില്‍ കലര്‍ത്താനാണ് ഈ സ്പിരിറ്റ് സൂക്ഷിച്ചതെന്നുമാണ് ഇരുവരുടെയും മൊഴി.
സ്പിരിറ്റിന്റെ ഉറവിടം സംബന്ധിച്ചും കൂടുതല്‍ പ്രതികള്‍ ഉണ്ടോയെന്ന കാര്യവും അന്വേഷിക്കുകയാണ് എന്ന് എക്സൈസ് അധികൃതര്‍ അറിയിച്ചു. അറസ്റ്റിലായ ഇരുവരെയും കോടതിയില്‍ ഹാജരാക്കി റിമാന്‍ഡ് ചെയ്തു.
