നോട്ട് എണ്ണാന്‍ 50 രൂപ അധികം ഈടാക്കി; ഫെഡറല്‍ ബാങ്കിന് പിഴയടിച്ച് ഉപഭോക്തൃ തര്‍ക്കപരിഹാര കോടതി
കൊച്ചി: ബാങ്കില്‍ നിക്ഷേപിക്കാനെത്തിച്ച പണം എണ്ണി തിട്ടപ്പെടുത്താന്‍ കൗണ്ടിങ് ചാര്‍ജ് എന്ന പേരില്‍ അന്യായതുക ഈടാക്കിയതില്‍ ഉപഭോക്തൃ കോടതിയുടെ ഇടപെടല്‍. നിയമവിരുദ്ധമായി 50 രൂപ അധികം ഈടാക്കിയ ബാങ്ക്, നഷ്ടപരിഹാരമായി 3,000/ രൂപയും കോടതി ചെലവിനത്തില്‍ 5,000 രൂപയും അധികമായി ഈടാക്കിയ 50 രൂപയും സഹിതം 8050 രൂപ ഉപഭോക്താവിന് നല്‍കണമെന്ന് എറണാകുളം ജില്ല ഉപഭോക്തൃ തര്‍ക്കപരിഹാര കോടതി ഫെഡറല്‍ ബാങ്ക് പെരുമ്പാവൂര്‍ ബ്രാഞ്ചിന് നിര്‍ദ്ദേശം നല്‍കി. എറണാകുളം അങ്കമാലി സ്വദേശി ഇ.എ.ബേബിയുടെ പരാതിയിലാണ് നടപടി. ബിസിനസ് […]
കൊച്ചി: ബാങ്കില്‍ നിക്ഷേപിക്കാനെത്തിച്ച പണം എണ്ണി തിട്ടപ്പെടുത്താന്‍ കൗണ്ടിങ് ചാര്‍ജ് എന്ന പേരില്‍ അന്യായതുക ഈടാക്കിയതില്‍ ഉപഭോക്തൃ കോടതിയുടെ ഇടപെടല്‍. നിയമവിരുദ്ധമായി 50 രൂപ അധികം ഈടാക്കിയ ബാങ്ക്, നഷ്ടപരിഹാരമായി 3,000/ രൂപയും കോടതി ചെലവിനത്തില്‍ 5,000 രൂപയും അധികമായി ഈടാക്കിയ 50 രൂപയും സഹിതം 8050 രൂപ ഉപഭോക്താവിന് നല്‍കണമെന്ന് എറണാകുളം ജില്ല ഉപഭോക്തൃ തര്‍ക്കപരിഹാര കോടതി ഫെഡറല്‍ ബാങ്ക് പെരുമ്പാവൂര്‍ ബ്രാഞ്ചിന് നിര്‍ദ്ദേശം നല്‍കി. എറണാകുളം അങ്കമാലി സ്വദേശി ഇ.എ.ബേബിയുടെ പരാതിയിലാണ് നടപടി.
ബിസിനസ് ആവശ്യത്തിന് വേണ്ടി കെ.കെ.ഫിലിപ്പ് എന്നയാളുടെ അക്കൗണ്ടില്‍ നിക്ഷേപിക്കാന്‍ 20,000 രൂപയാണ് പരാതിക്കാരന് ബാങ്കില്‍ എത്തിച്ചത്. 20 രൂപയുടെ നൂറ് നോട്ടുകള്‍ അടങ്ങിയ 10 ബണ്ടില്‍ ആയിരുന്നു. ഈ നോട്ടുകള്‍ എണ്ണിയെടുത്തതിന്റെ പേരില്‍ ബാങ്ക് 100 രൂപ ചാര്‍ജ് ഈടാക്കി. എന്നാലിത് അന്യായമാണെന്നും 50 രൂപ മാത്രമേ ഈടാക്കാന്‍ നിയമപ്രകാരം കഴിയൂവെന്നും ബോധ്യപ്പെട്ട പരാതിക്കാരന് ബാങ്കിന് നോട്ടീസയച്ചു. അധികമായി വാങ്ങിയ തുക തിരിച്ച് നല്‍കണമെന്നും അതിനൊപ്പം 5 ലക്ഷം രൂപ നഷ്ടപരിഹാരം, 25000 കോടതി ചെലവ് എന്നിങ്ങനെ നല്‍കണമെന്നും നോട്ടീസില്‍ ആവശ്യം ഉന്നയിച്ചിരുന്നു. ഇത് നിരാകരിക്കപ്പെട്ടതോടെ ആണ് ഉപഭോക്തൃ കോടതിയെ സമീപിച്ചത്.
എന്നാല്‍ 50 രൂപ അധികം വാങ്ങിയത് തെറ്റാണെന്ന് ബോധ്യപ്പെട്ടതായി ബാങ്ക് കോടതി മുന്‍പാകെ ബോധിപ്പിച്ചു. എന്നാല്‍ പരാതിക്കാരന് ബാങ്കില്‍ അക്കൗണ്ട് ഇല്ലാത്തതുകൊണ്ട് അദ്ദേഹം തന്റെ ബെനിഫിഷ്യറിയായി നേരത്തെ പണമടച്ച കെ.കെ.ഫിലിപ്പിന്റെ അക്കൗണ്ടിലേക്ക് ഏടഠ തുക ഉള്‍പ്പെടെ 59 രൂപ അയച്ചു കൊടുത്തുവെന്നും ബാങ്ക് വാദിച്ചു. നോട്ടീസയച്ച പരാതിക്കാരനെ അറിയിക്കുകയോ അയാളുടെ അനുവാദം ചോദിക്കുകയോ ചെയ്യാതെ തുക മറ്റൊരു അക്കൗണ്ടിലേക്ക് അയച്ചത് സേവനത്തിലെ ന്യൂനതയാണെന്ന് ഡി.ബി ബിനു പ്രസിഡന്റ് ,വി രാമചന്ദ്രന്‍ ,ടി എന്‍ ശ്രീവിദ്യ എന്നിവര്‍ അംഗങ്ങളുമായ ബെഞ്ച് വിലയിരുത്തി.
'ബാങ്കിന്റെ ചട്ടത്തിനു വിരുദ്ധമായി 50 രൂപ അധികമായി വാങ്ങി എന്നത് ബാങ്ക് സമ്മതിച്ചു. തെറ്റുപറ്റിയെന്ന് ബോധ്യമായപ്പോഴും ആ തുക പരാതിക്കാരന് തന്നെ നല്‍കുന്നതില്‍ ബാങ്ക് വീഴ്ചവരുത്തി. അനുവാദമില്ലാതെ ആ തുക ബെനിഫിഷ്യറിയുടെ അക്കൗണ്ടിലേക്ക് അയക്കുകയാണ് ചെയ്തതെന്ന് കോടതി നിരീക്ഷിച്ചു.'
കോടതി ചെലവ് ഉള്‍പ്പെടെ 8050 ഒരു മാസത്തിനകം പരാതിക്കാരന് നല്‍കണമെന്നും വീഴ്ച വരുത്തിയാല്‍ പലിശ സഹിതം നല്‍കേണ്ടി വരുമെന്നും ഉത്തരവിലുണ്ട്. പരാതിക്കാരന് വേണ്ടി അഡ്വ. അരുണ്‍ അശോക് ഇയ്യാനി ഹാജരായി.
