'വിവാഹവേദിയില്‍ നിന്ന് രജിസ്‌ട്രേഷന്‍, തത്സമയം സര്‍ട്ടിഫിക്കറ്റ്'; അമേരിക്കയില്ല, ഇങ്ങ് കാവശേരിയില്‍, കേരളം മാറിയ കാഴ്ച്ചയെന്ന് മന്ത്രി എം ബി രാജേഷ്
കേരളം മാറിയ കാഴ്ച്ചയെന്ന് മന്ത്രി എം ബി രാജേഷ്
പാലക്കാട്: വിവാഹ വേദിയില്‍ തന്നെ വിവാഹ സര്‍ട്ടിഫിക്കറ്റ്. ഇത് അമേരിക്കയിലെ കഥയല്ല, ഇങ്ങ് കാവശേരിയില്‍. കെ സ്മാര്‍ട്ടിലൂടെ വിവാഹം രജിസ്റ്റര്‍ ചെയ്ത് ലാവണ്യയ്ക്കും വിഷ്ണുവിനുമാണ് മിനിറ്റുകള്‍ക്കകം വിവാഹ സര്‍ട്ടിഫിക്കറ്റ് ലഭിച്ചത്. മന്ത്രി എം ബി രാജേഷാണ് കെ സ്മാര്‍ട്ടിന്റെ ഡിജിറ്റല്‍ വിപ്ലവം ഫെയ്‌സ്ബുക്കിലൂടെ പങ്കുവെച്ചത്.
അവധിദിനമായിട്ട് പോലും കാവശ്ശേരി പഞ്ചായത്ത് ജീവനക്കാര്‍ തത്സമയം ഈ അപേക്ഷ അപ്രൂവ് ചെയ്തതോടെയാണ് വിവാഹ ദിവസം തന്നെ സര്‍ട്ടിഫിക്കറ്റ് ദമ്പതികള്‍ക്ക് ലഭിച്ചത്. വധൂവരന്മാര്‍ക്കൊപ്പം ഫോട്ടോയെടുക്കാന്‍ പഞ്ചായത്ത് അംഗം ടി വേലായുധന്‍ എത്തിയപ്പോള്‍ നവദമ്പതികള്‍ക്ക് പ്രിന്റ് ചെയ്ത സര്‍ട്ടിഫിക്കറ്റും കൈമാറുകയായിരുന്നു. കെ സ്മാര്‍ട്ട് നിലവില്‍ വന്ന ശേഷം നടന്ന 1,50,320 വിവാഹ രജിസ്‌ട്രേഷനില്‍ 62,915 എണ്ണവും വീഡിയോ കെവൈസി വഴിയാണ് ചെയ്തതെന്ന് മന്ത്രി പറഞ്ഞു.
മന്ത്രിയുടെ ഫേസ്ബുക്ക് കുറിപ്പ്:
ഒരു വിവാഹവേദിയില്‍ ഇന്ന് നടന്നത് കാണൂ... ഇത് അമേരിക്കയിലൊന്നുമല്ല, ഇങ്ങ് കാവശേരിയിലാണ്... ഇങ്ങനെയൊക്കെയാണ് കേരളം മാറിയത്??
ദീപാവലി ദിവസമായ ഇന്നായിരുന്നു ലാവണ്യയുടെയും വിഷ്ണുവിന്റെയും വിവാഹം. വിവാഹം കഴിഞ്ഞയുടന്‍ തന്നെ കെ- സ്മാര്‍ട്ട് വഴി ഇരുവരും വിവാഹ രജിസ്‌ട്രേഷന്‍ അപേക്ഷ വീഡിയോ കെവൈസി വഴി പൂര്‍ത്തിയാക്കി. അവധിദിനമായിട്ട് പോലും കാവശ്ശേരി പഞ്ചായത്ത് ജീവനക്കാര്‍ തത്സമയം ഈ അപേക്ഷ അപ്രൂവ് ചെയ്തു. മിനുട്ടുകള്‍ക്കകം സര്‍ട്ടിഫിക്കറ്റ് വാട്ട്‌സാപ്പിലെത്തി. വധൂവരന്മാര്‍ക്കൊപ്പം ഫോട്ടോയെടുക്കാന്‍ പഞ്ചായത്ത് അംഗം ടി വേലായുധന്‍ എത്തിയപ്പോള്‍ നവദമ്പതികള്‍ക്ക് പ്രിന്റ് ചെയ്ത സര്‍ട്ടിഫിക്കറ്റും കൈമാറി.
കെ സ്മാര്‍ട്ട് നിലവില്‍ വന്ന ശേഷം നടന്ന 1,50,320 വിവാഹ രജിസ്‌ട്രേഷനില്‍ 62,915 എണ്ണവും വീഡിയോ കെവൈസി വഴിയാണ് ചെയ്തത്. പഞ്ചായത്ത് ഓഫീസില്‍ പോകാതെ വിവാഹം രജിസ്റ്റര്‍ വീഡിയോ കെ വൈ സി വഴി വിവാഹം രജിസ്റ്റര്‍ ചെയ്യാനുള്ള സൗകര്യം വധൂവരന്മാരും, അവധി ദിനത്തില്‍ പോലും എവിടെയിരുന്നും ഫയലുകള്‍ അപ്രൂവ് ചെയ്യാനുള്ള സംവിധാനം ജീവനക്കാരും വിനിയോഗിച്ചു. കാവശേരി പഞ്ചായത്തിലെ ഈ ജീവനക്കാര്‍ എല്ലാവര്‍ക്കും മാതൃകയാണ്, അവരെ പ്രത്യേകം അഭിനന്ദിക്കുന്നു. കെ സ്മാര്‍ട്ട് എന്ന ഈ ഡിജിറ്റല്‍ വിപ്ലവം സാധ്യമാക്കിയ ഇന്‍ഫര്‍മേഷന്‍ കേരള മിഷന് പ്രത്യേക അഭിനന്ദനങ്ങള്‍. ലാവണ്യയ്ക്കും വിഷ്ണുവിനും വിവാഹ മംഗളാശംസകള്‍...
