കണ്ണൂർ: യാത്രകളെ സ്നേഹിക്കുന്ന മലയാളിക്ക് ആദ്യം ഓർമ്മ വരുന്നത് ട്രെയിൻ യാത്രകളാണ്. ഓരോ ദിവസവും ലക്ഷക്കണക്കിന് ആളുകൾ വന്നുപോകുന്ന ഇടമായതിനാൽ പലപ്പോഴും റെയിൽവേ സ്റ്റേഷനുകൾ വൃത്തിഹീനമായി കാണപ്പെടാറുണ്ട്. എന്നാൽ കേരളത്തിലെ റെയിൽവേ സ്റ്റേഷനുകൾ ഇതിൽ നിന്നെല്ലാം വ്യത്യസ്തമാണെന്ന് പലപ്പോഴായി തെളിയിക്കപ്പെട്ടിട്ടുണ്ട്. ഇപ്പോൾ ഇതാ, കണ്ണൂർ റെയിൽവേ സ്റ്റേഷനിലെ അവിശ്വസനീയമായ ശുചിത്വം കണ്ട് അത്ഭുതപ്പെട്ടിരിക്കുകയാണ് അസം സ്വദേശിയായ ഒരു യുവാവ്.

അസം സ്വദേശിയായ യുവാവ് തന്റെ ഇൻസ്റ്റാഗ്രാമിലൂടെ പങ്കുവെച്ച വീഡിയോയാണ് ഇപ്പോൾ സോഷ്യൽ മീഡിയയിൽ തരംഗമായിരിക്കുന്നത്. സ്റ്റേഷന്റെ പ്ലാറ്റ്‌ഫോമുകളും ട്രാക്കുകളും മിന്നിത്തിളങ്ങുന്നത് കണ്ട് തനിക്ക് വിശ്വസിക്കാനാവുന്നില്ലെന്ന് ഇദ്ദേഹം വീഡിയോയിൽ പറയുന്നു. "ഇത് കേരളത്തിലെ ഒരു റെയിൽവേ സ്റ്റേഷനാണോ അതോ എയർപോർട്ടാണോ?" എന്നായിരുന്നു യുവാവിന്റെ അമ്പരപ്പോടെയുള്ള ചോദ്യം.

വീഡിയോ വൈറലായതോടെ നിരവധി പേരാണ് കണ്ണൂർ റെയിൽവേ സ്റ്റേഷനെ അഭിനന്ദിച്ച് രംഗത്തെത്തുന്നത്. കേരളത്തിലെ പല സ്റ്റേഷനുകളും ഈ രീതിയിൽ തന്നെയാണ് സംരക്ഷിക്കപ്പെടുന്നതെന്നും ഇതിന് പിന്നിൽ ശുചിത്വ തൊഴിലാളികൾക്കൊപ്പം തന്നെ യാത്രക്കാരുടെ മനോഭാവവും പ്രധാനമാണെന്നും ആളുകൾ കമന്റ് ചെയ്യുന്നു.

മുമ്പും പാലക്കാട്, കോഴിക്കോട് റെയിൽവേ സ്റ്റേഷനുകളിലെ ശുചിത്വം കണ്ട് ഉത്തരേന്ത്യൻ യാത്രക്കാർ അമ്പരക്കുന്ന വീഡിയോകൾ പുറത്തുവന്നിട്ടുണ്ട്. രാജ്യത്തെ റെയിൽവേ സ്റ്റേഷനുകളുടെ ശുചിത്വ സർവേകളിൽ പലപ്പോഴും കേരളത്തിലെ സ്റ്റേഷനുകൾ മുൻനിരയിൽ എത്താറുണ്ട്. ആ ഖ്യാതി നിലനിർത്തുന്നതാണ് പുതിയ വീഡിയോയും.

കണ്ണൂർറെയിൽവേ സ്റ്റേഷൻവൃത്തി

സ്വന്തം ലേഖകൻ