വിശ്വാസ്യത കളയുന്ന ഒരുകാര്യവും ചെയ്തിട്ടില്ല; നിങ്ങളുടെ മുന്നില്‍ ഒരു ചെറിയ കലാകാരനായി നില്‍ക്കാന്‍ കൊതിയാണ്! ഏത് ഷേപ്പില്‍ വന്നാലും നിങ്ങളുണ്ടാവണം! ഉണ്ടാവില്ലേടേ: വൈകാരിക കുറിപ്പുമായി കൂട്ടിക്കല്‍ ജയചന്ദ്രന്‍
വൈകാരിക കുറിപ്പുമായി കൂട്ടിക്കല്‍ ജയചന്ദ്രന്‍
കൊച്ചി: തന്റെ വിശ്വാസ്യത കളയുന്ന ഒന്നും ചെയ്തിട്ടില്ലെന്ന വൈകാരിക കുറിപ്പുമായി നടനും മിമിക്രി കലാകാരനുമായ കൂട്ടിക്കല്‍ ജയചന്ദ്രന്‍. അടുത്ത ബന്ധുവിന്റെ നാലുവയസുള്ള മകളെ പീഡിപ്പിച്ചെന്ന ഗുരുതരമായ ആരോപണം ഉയര്‍ന്നതിനെ തുടര്‍ന്ന് നിയമനടപടികള്‍ നേരിടുകയാണ് നടന്‍.
'നിങ്ങളോട് പങ്കുവയ്ക്കാത്ത ഒരു കാര്യവുമെനിക്കില്ല! വിശ്വാസ്യത കളയുന്ന ഒരുകാര്യവും ചെയ്തിട്ടുമില്ല!' എന്ന് പറഞ്ഞുകൊണ്ടാണ് അദ്ദേഹം തന്റെ പോസ്റ്റ് ആരംഭിക്കുന്നത്. ഒരു സിനിമയിലെങ്കിലും അഭിനയിക്കണമെന്ന ബാല്യകാല സ്വപ്നമാണ് തന്നെ ഈ രംഗത്തെത്തിച്ചതെന്നും, ഒരു അസന്മാര്‍ഗ്ഗികതയിലും വീണുപോകാതെ പ്രകൃതി തന്റെ വഴി തെളിയിച്ചതായും അദ്ദേഹം വ്യക്തമാക്കുന്നു. സിനിമയിലെത്തിയ ശേഷമുണ്ടായ അനുഭവങ്ങളെക്കുറിച്ചും സഹപ്രവര്‍ത്തകരുടെയും നാട്ടുകാരുടെയും ചിലരുടെയും പ്രതികരണങ്ങളെക്കുറിച്ചും അദ്ദേഹം വേദനയോടെ പങ്കുവെക്കുന്നു. 'കൂടെ ഒരുവന്‍ നന്നാവുന്നതില്‍ ഇത്രയധികം വയറുനോവുണ്ടാകുന്ന മറ്റൊരു ജീവിയില്ല!' എന്ന് അദ്ദേഹം കൂട്ടിച്ചേര്‍ത്തു.
'ദൃശ്യം', 'ചാന്തുപൊട്ട്' തുടങ്ങിയ ചിത്രങ്ങളടക്കം മുപ്പതോളം സിനിമകളില്‍ അഭിനയിക്കാന്‍ കഴിഞ്ഞതില്‍ അത്ഭുതം തോന്നുന്നതായും, അവരെല്ലാം തന്നെ സഹകരിപ്പിച്ചവരെ മരണം വരെ സ്മരിക്കുമെന്നും, ദ്രോഹിച്ചവരെയും ഓര്‍ക്കുമെന്നും അദ്ദേഹം പറഞ്ഞു. തനിക്കെതിരെ ഉയര്‍ന്ന മാരകമായ ആരോപണങ്ങള്‍ക്കിടയിലും, നിരവധിപേര്‍ മെസ്സേജിലൂടെയും കമന്റുകളിലൂടെയും തന്നിലുള്ള വിശ്വാസം അറിയിക്കുന്നതുകൊണ്ടാണ് ഇത് എഴുതാന്‍ കാരണമെന്നും അദ്ദേഹം വ്യക്തമാക്കി. 'മരണം വരെ നിങ്ങളുടെ മുന്നില്‍ ഒരു ചെറിയ കലാകാരനായി നില്‍ക്കാന്‍ കൊതിയാണ്!' എന്ന് പറഞ്ഞുകൊണ്ടാണ് അദ്ദേഹം തന്റെ കുറിപ്പ് അവസാനിപ്പിക്കുന്നത്.
കൂട്ടിക്കല്‍ ജയചന്ദ്രന്റെ കുറിപ്പിന്റെ പൂര്‍ണരൂപം:
നിങ്ങളോട് പങ്കുവയ്ക്കാത്ത ഒരുകാര്യവുമെനിക്കില്ല! നിങ്ങളുടെ വിശ്വാസ്യത കളയുന്ന ഒരുകാര്യവും ചെയ്തിട്ടുമില്ല! ഒരൊറ്റ സിനിമയില്‍ എങ്കിലും ഈ ജന്മം അഭിനയിക്കണം എന്ന കുഞ്ഞുന്നാളിലെയുള്ള മോഹതീഷ്ണത ഒന്നു മാത്രം എന്നെ അവിടെയെത്തിച്ചു! ഒരു അസന്മാര്‍ഗ്ഗികതയിലൂടെയും പോകാന്‍ ഇടവരുത്താതെ പ്രകൃതി വഴികാട്ടി.ഹോ, അവിടെത്തിയിട്ട് എന്തൊക്കെ നേരിട്ടെന്നറിയാമോ!
സഹപ്രവര്‍ത്തകര് ഞെളിപിരി കൊണ്ട് എന്തൊക്കെയോ ചെയ്യുന്നു, നാട്ടുകാരിnും, കൂട്ടുകാരിലും 'ചിലര്‍' ഇരിക്കപ്പൊറുതിയില്ലാതെ കീഴുമേല് മറിയുന്നു...ദാ! ഇപ്പോള്‍ ഭാര്യയൊഴിച്ച് കുറെ വീട്ടുകാരും! കൂടെ ഒരുവന്‍ നന്നാവുന്നതില്‍ ഇത്രയധികം വയറുനോവുണ്ടാകുന്ന മറ്റൊരു ജീവിയില്ല!എന്നിട്ടും, ഈ അസൂയാമേദ്യങ്ങളുടെ ഇടയിലൂടെ 'ദൃശ്യം', 'ചാന്തുപൊട്ട്' ഇത്തരം അസാദ്ധ്യമായ വിജയങ്ങളുള്‍പ്പടെ മുപ്പതോളം സിനിമകളില്‍ പങ്കാവാന്‍ കഴിഞ്ഞതില്‍ അത്ഭുതം തോന്നുന്നു. അതിലെല്ലാം സഹകരിപ്പിച്ചവരെ മരണം വരെ സ്മരിക്കും., ദ്രോഹിച്ചവരെയും!
ഇതെല്ലാം എഴുതാന്‍ കാരണം, ആരും അറച്ച് പോവുന്ന മാരകമായ ആരോപണം ഏല്‍പ്പിച്ചിട്ടും, നിങ്ങളില്‍ ഒരു വലിയ വിഭാഗം മെസ്സേജിലൂടെയും, കമന്റിലൂടെയും എന്നിലുള്ള വിശ്വാസം അറിയിക്കുന്നത് കൊണ്ടാണ്! മരണം വരെ നിങ്ങളുടെ മുന്നില്‍ ഒരു ചെറിയ കലാകാരനായി നില്‍ക്കാന്‍ കൊതിയാണ്! ഇനി, ഞാനേത് ഷേപ്പില്‍ വരുവെന്നറിയത്തില്ല! ഏത് ഷേപ്പില്‍ വന്നാലും നിങ്ങളുണ്ടാവണം! ഉണ്ടാവില്ലേടേ.
