200 മെഗാവാട്ട് വൈദ്യുതി കെഎസ്ഇബിക്ക് നൽകി മധ്യപ്രദേശ് വൈദ്യുതി ബോർഡ്; വൈദ്യുതി ലഭ്യമാക്കിയത് സ്വാപ്പ് വ്യവസ്ഥയിൽ

ഭോപ്പാൽ: വൈദ്യുതി പ്രതിസന്ധി നേരിടുന്ന കെഎസ്ഇബിക്ക് ഒരു ആശ്വാസവാർത്ത. മധ്യപ്രദേശ് വൈദ്യുതി ബോർഡ് 200 മെഗാവാട്ട് വൈദ്യുതി നൽകി. അടുത്ത വർഷം തിരിച്ച് നൽകാമെന്ന വ്യവസ്ഥയിലാണ് വൈദ്യുതി നൽകിയത്. കഴിഞ്ഞ ദിവസം മുതൽ വൈദ്യുതി ലഭിച്ചു തുടങ്ങി. വൈദ്യുതി ഒരു മാസത്തേക്കായിരിക്കും ലഭിക്കുക. ടെൻഡർ ഇല്ലാതെയാണ് സ്വാപ്പ് വ്യവസ്ഥയിൽ വൈദ്യുതി ലഭ്യമാക്കിയത്.

അതേസമയം സംസ്ഥാനത്ത് മഴ കുറഞ്ഞതോടെ വൈദ്യുതി ഉത്പാദനവും ഉപഭോഗവും തമ്മിൽ വലിയ അന്തരമാണുള്ളത്. ആവശ്യത്തിനുള്ള വെള്ളം ഡാമുകളിൽ ഇല്ലാത്തതിനാൽ ഉത്പാദനം കൂട്ടി പ്രതിസന്ധി പരിഹരിക്കാനുള്ള സാഹചര്യമില്ല. റദ്ദാക്കപ്പെട്ട ദീർഘകാല കരാറുകളിലൂടെ ഡിസംബർ വരെ വൈദ്യുതി വാങ്ങാൻ അനുമതി ഉണ്ടെങ്കിലും കമ്പനികൾ വൈദ്യുതി നൽകുന്നില്ല. പുതിയ കരാറുകൾ വഴി വൈദ്യുതി ഉറപ്പാക്കാൻ ഇതോടെയാണ് കെഎസ്ഇബി നീക്കം ആരംഭിച്ചത്.