കിളിമാനൂരേക്ക് പുറപ്പെട്ട സിറ്റി ഫാസ്റ്റ് ബസ്; പാതി ദൂരമെത്തിയതും ഉഗ്രശബ്ദം; ഓടിക്കൊണ്ടിരിക്കെ മുന്നിലെ ടയർ ഇളകിത്തെറിച്ച് അപകടം; പരിഭ്രാന്തിയിൽ യാത്രക്കാർ; ഒഴിവായത് വൻ അപകടം

തിരുവനന്തപുരം: തിരുവനന്തപുരത്ത് ഓടിക്കൊണ്ടിരുന്ന കെഎസ്ആർടിസി ബസിന്റെ മുൻ ചക്രം ഊരിത്തെറിച്ച് വൻ അപകടം ഒഴിവാക്കി. ഇന്ന് (ഡിസംബർ 9, 2025) ഉച്ചയോടെ ആലംകോടിന് സമീപം കാവുനട ജംഗ്ഷനിലാണ് സംഭവം നടന്നത്.

തിരുവനന്തപുരത്ത് നിന്ന് കിളിമാനൂരേക്ക് പോവുകയായിരുന്ന സിറ്റി ഫാസ്റ്റ് ബസിന്റെ ഇടത് വശത്തെ മുൻ ടയറാണ് ഓട്ടത്തിനിടെ ഇളകിപ്പോയത്. ചക്രം ഊരിത്തെറിച്ചതോടെ ബസ് റോഡിൽ ഉരഞ്ഞ് ചരിഞ്ഞ് നിന്നു. അപകടത്തിൽ യാത്രക്കാർ ഭയന്ന് നിലവിളിച്ചെങ്കിലും ആർക്കും പരിക്കേൽക്കാതിരുന്നത് വലിയ ആശ്വാസമായി.

ബസിൽ നിന്ന് വേർപെട്ട ടയർ സമീപത്തുണ്ടായിരുന്ന ഒരു ബൈക്കിലും ചെറിയ മതിലിലും ഇടിച്ച ശേഷം നിലച്ചു. പരിസരത്ത് ആളുകളില്ലാതിരുന്നതിനാൽ വൻ ദുരന്തം ഒഴിവായി. കാലപ്പഴക്കം ചെന്ന ബസുകൾ സർവീസ് നടത്തുന്നതാണ് ഇത്തരം അപകടങ്ങൾക്ക് കാരണമെന്ന് നാട്ടുകാർ ആരോപിച്ചു.