ന്യായാധിപനാകാന് പാദസേവയല്ല, നല്ല അഭിഭാഷകനാവുകയാണ് വേണ്ടതെന്ന് ജസ്റ്റിസ് സിറിയക് ജോസഫ്; അഖില കേരള നിയമ ക്വിസ് മത്സരത്തിലെ വിജയികള്ക്ക് പുരസ്ക്കാരം സമ്മാനിച്ചു
ന്യായാധിപനാകാന് പാദസേവയല്ല, നല്ല അഭിഭാഷകനാവുകയാണ് വേണ്ടതെന്ന് ജസ്റ്റിസ് സിറിയക് ജോസഫ്
കൊല്ലം: ന്യായാധിപനാകാന് പാദസേവ ചെയ്യണമെന്ന പൊതുബോധം തെറ്റാണെന്നും നല്ല അഭിഭാഷകനായി കഠിന പ്രയത്നം ചെയ്താല് മതിയെന്നും സുപ്രീം കോടതി മുന് ജഡ്ജി, ജസ്റ്റിസ് സിറിയക് ജോസഫ് പറഞ്ഞു. അതിന്റെ തെളിവാണ് ജസ്റ്റിസ് സിരി ജഗന്റെ ന്യായാധിപ പദവി. ജസ്റ്റിസ് സിരി ജഗന് നീതിയുടെയും, നിഷ്പക്ഷതയുടെയും, മാനവികതയുടെയും ഉദാത്ത മാതൃകയായിരുന്നു. അദ്ദേഹം ഇനി നമ്മോടൊപ്പമില്ലെങ്കിലും, അദ്ദേഹത്തിന്റെ സ്മരണകള് ഇന്നത്തെ ക്വിസ് മത്സര പരിപാടിയില് നിറഞ്ഞുനിന്നു.
ജസ്റ്റിസ് സിരി ജഗന് സ്മാരക ഓള് കേരള ലീഗല് ക്വിസ് മത്സരം ഇന്ന് കൊല്ലത്ത് നടന്നത് മുന് ജഡ്ജിമാര്, പ്രമുഖ മുതിര്ന്ന അഭിഭാഷകര്, സേവനത്തിലുള്ള ന്യായാധിപന്മാര്, യുവ അഭിഭാഷകര് എന്നിവരുടെ സാന്നിധ്യത്തിലായിരുന്നു. സമ്മാനദാന പരിപാടി ഉദ്ഘാടനം ചെയ്യുകയായിരുന്നു ജസ്റ്റിസ് സിറിയക് ജോസഫ്. കൊല്ലം ബാര് അസോസിയേഷന്, പനമ്പിള്ളി അക്കാദമി ഫോര് കണ്ടിന്യൂയിംഗ് ലീഗല് എഡ്യുക്കേഷന് എന്നിവര് സംയുക്തമായിട്ടാണ് മത്സരം സംഘടിപ്പിച്ചത്.
കല്പ്പറ്റ ഒറ്റപ്പാലം, നെടുമങ്ങാട്, കൊച്ചി, ആലുവ, വടകര, കേരള ഹൈക്കോടതി അഡ്വക്കേറ്റ്സ് അസോസിയേഷന് തുടങ്ങി സംസ്ഥാനത്തെ വിവിധ ബാര് അസോസിയേഷനുകളെ പ്രതിനിധീകരിച്ച് 100 യുവ അഭിഭാഷകര് ആവേശത്തോടെയും ഉത്സാഹത്തോടെയും മത്സരത്തില് പങ്കെടുത്തു. അവരുടെ മികച്ച പ്രകടനം പ്രേക്ഷകരെ അത്ഭുതപ്പെടുത്തി.
ദിവസമെങ്ങും നീണ്ട കടുത്ത മത്സരത്തിനൊടുവില്, നെടുമങ്ങാട് ബാര് അസോസിയേഷനിലെ ശ്രീഹരി എം ബി, ദേവിനാഥ് എ എന്നിവര് ഒന്നാം സ്ഥാനം നേടി. ഇവര്ക്ക് 25,000 രൂപയും ട്രോഫിയും (ജസ്റ്റിസ് സിരി ജഗന് സ്മാരകമായി സ്പോണ്സര് ചെയ്തത്) സമ്മാനമായി ലഭിച്ചു. ആറ്റിങ്ങല് ബാര് അസോസിയേഷനിലെ ശരത് എസ്, വിവേക് എസ് എന്നിവര് രണ്ടാം സ്ഥാനം നേടി. ഇവര്ക്ക് 20,000 രൂപയും ട്രോഫിയും (അഡ്വ. രമേഷ് കുമാര്, ആര്.കെ.എല് അസോസിയേറ്റ്സ്, കൊല്ലം സ്പോണ്സര് ചെയ്തത്) ലഭിച്ചു.
കൊല്ലം ബാര് അസോസിയേഷനിലെ സൂസന് ബേസില്, ആര്യ എ എസ് എന്നിവര് മൂന്നാം സ്ഥാനം നേടി. ഇവര്ക്ക് 15,000 രൂപ (അഡ്വ. പരിപ്പള്ളി രവീന്ദ്രന് സ്മാരകം അഡ്വ. വി.ഐ. ഹാരിസ് & അഡ്വ. ഓച്ചിറ എന് അനില്കുമാര് സ്പോണ്സര് ചെയ്തത്) സമ്മാനമായി ലഭിച്ചു. ഏറ്റവും മുന്നിലെത്തിയ മറ്റു 10 ടീമുകള്ക്ക് ഓരോന്നിന് 10,000 രൂപ വീതം ആശ്വാസ സമ്മാനമായി ലഭിച്ചു. ഈ സമ്മാനങ്ങള് വിവിധ സ്മാരകങ്ങളുടെയും സംഘടനകളുടെയും സഹകരണത്തോടെയായിരുന്നു.
ആശ്വാസ സമ്മാനം നേടിയ ടീമുകള്:
ഒട്ടപ്പാലം ബാര് അസോസിയേഷനിലെ മുഹമ്മദ് ആഷിഖ്, മുനീര് പി;
കല്പ്പറ്റ ബാര് അസോസിയേഷനിലെ റഷീന തസ്നീം, അനുശ്രീ എം ജി;
ശാസ്താംകോട്ട ബാര് അസോസിയേഷനിലെ ബബിത ബി എസ്, അല്ഫിയ ജലാല്;
കടയ്ക്കല് ബാര് അസോസിയേഷനിലെ ഗോകുല് എം എസ്, അലിം എസ്;
ചങ്ങനാശ്ശേരി ബാര് അസോസിയേഷനിലെ അജയ് വിഷ്ണു, ജസ്റ്റിന് ജോസഫ്;
കൊട്ടാരക്കര ബാര് അസോസിയേഷനിലെ റോഷ്നി ലില് മാത്യു, പി ആര് അര്ക്കനന്ദിനി;
മാവേലിക്കര ബാര് അസോസിയേഷനിലെ മേഘ അരവിന്ദ്, ഗോകുല് എം മോഹന്;
കൊച്ചി ബാര് അസോസിയേഷനിലെ സൂര്യ എസ് ഷെണോയ്, കരുണ ബാബു;
ആലുവ ബാര് അസോസിയേഷനിലെ രാധേഷ് ആര് ഷെണോയ്, അശ്വിന് കൈലാസ്;
കായംകുളം ബാര് അസോസിയേഷനിലെ ആശിഷ് ഏബി ഡേവിഡ്, സി എച്ച് വിവേക് നമ്പൂതിരി.
ഇതുകൂടാതെ, മികച്ച ഓള്റൗണ്ടര്ക്കും രണ്ടാം മികച്ച ഓള്റൗണ്ടര്ക്കുമായി രണ്ട് പ്രത്യേക പുരസ്കാരങ്ങളും ഉണ്ടായിരുന്നു (ഡോ. അമൃത, സബ് ജഡ്ജി & ഡി.എല്.എസ്.എ സെക്രട്ടറി നിര്ണയിച്ചത്). ഈ പുരസ്കാരങ്ങള് ശരത് എസ് (25,000 ജസ്റ്റിസ് പയസ് സി കുര്യാക്കോസ് സ്പോണ്സര് ചെയ്തത്), സൂസന് ബേസില് (20,000 അഡ്വ. മാത്യൂസ് കെ ഉത്തുപ്പച്ചന് സ്പോണ്സര് ചെയ്തത്) എന്നിവര് നേടി.
സമ്മാനങ്ങള് സമാപന സമ്മേളനത്തില് വിതരണം ചെയ്തു. കേരളത്തിന്റെ അഡ്വക്കേറ്റ് ജനറല് അഡ്വ. ഗോപാലകൃഷ്ണ കുറുപ്പ് മുഖ്യ പ്രഭാഷണം നടത്തി. ക്വിസ് മാസ്റ്റര്മാരായ ജസ്റ്റിസ് പയസ് സി കുര്യാക്കോസ് (മുന് ചീഫ് ജസ്റ്റിസ്, സിക്കിം ഹൈക്കോടതി), ജസ്റ്റിസ് സുനില് തോമസ് (മുന് ജഡ്ജി, കേരള ഹൈക്കോടതി; നിലവില് സെന്ട്രല് അഡ്മിനിസ്ട്രേറ്റീവ് ട്രിബ്യൂണല് ജുഡീഷ്യല് മെമ്പര്), ജസ്റ്റിസ് എ എം ബാബു (മുന് ജഡ്ജി, കേരള ഹൈക്കോടതി; സുപ്രീം കോടതിയിലെ സീനിയര് അഡ്വക്കേറ്റ്) ശ്രീ എന് വി രാജു (പ്രിന്സിപ്പല് ജില്ലാ & സെഷന്സ് ജഡ്ജി, കൊല്ലം) എന്നിവര് പ്രസംഗിച്ചു.
അഡ്വ. പി ബി ശിവന് (പ്രസിഡന്റ്, കൊല്ലം ബാര് അസോസിയേഷന്), അഡ്വ. കെ ബി മഹേന്ദ്ര (സെക്രട്ടറി, കൊല്ലം ബാര് അസോസിയേഷന്), അഡ്വ. അനുബ് ബി മുണ്ടക്കല്, ക്വിസ് കോ-ഓര്ഡിനേറ്റര് അഡ്വ ബോറിസ് പോള് എന്നിവര് ചടങ്ങില് സംസാരിച്ചു.
