ന്യൂഡൽഹി: സനാതനധർമ മൂല്യങ്ങൾ ചോദ്യം ചെയ്യപ്പെടാനാവാത്തവയാണെങ്കിൽ ബിജെപി ഇന്ത്യൻ ഭരണഘടനയെ അംഗീകരിക്കുന്നുണ്ടോയെന്ന് സിപിഐ എം പൊളിറ്റ്ബ്യൂറോ അംഗം എം എ ബേബി ചോദിച്ചു. നമ്മുടെ ഭരണഘടന മനുഷ്യതുല്യത അടിസ്ഥാനമാക്കിയുള്ളതാണെന്ന് അദ്ദേഹം ഫേസ്‌ബുക്ക് കുറിപ്പിൽ ചൂണ്ടിക്കാട്ടി.
സനാതനധർമത്തെ ദ്രാവിഡപ്രസ്ഥാന ചിന്തയ്ക്ക് അനുസരിച്ച് വിമർശിച്ച ഉദയനിധി സ്റ്റാലിന് 'വസ്തുതകൾ വച്ച് ഉചിതമായി മറുപടി' നൽകണമെന്ന് പ്രധാനമന്ത്രി നരേന്ദ്ര മോദി പറഞ്ഞതായ റിപ്പോർട്ടിനോട് പ്രതികരിക്കുകയായിരുന്നു ബേബി.
സനാതനധർമത്തിന്റെ ഭാഗമായ വർണധർമത്തെ, അതായത് ജാതിവ്യവസ്ഥയെ ബിജെപി പിന്തുണയ്ക്കുന്നുണ്ടോയെന്നും ബേബി ആരാഞ്ഞു. മനുഷ്യർ വിവിധ വർണങ്ങളിൽ (ജാതികളിൽ) ജനിക്കുന്നു, അവരവരുടെ ജാതികൾക്ക് നിശ്ചയിച്ച ധർമങ്ങൾ നിർവഹിക്കുന്നു എന്നാണോ നിങ്ങളുടെ അഭിപ്രായം? മനുഷ്യത്വവിരുദ്ധ ജാതിവിവേചനചിന്തകൾ ഇന്നും തുടരണമോ? നഃ സ്ത്രീ സ്വാതന്ത്ര്യമർഹതി'; 'ശൂദ്രമക്ഷരസംയുക്തം, ദൂരതഃ പരിവർജയേൽ' തുടങ്ങിയ മനുഷ്യവിരുദ്ധമായ ആശയങ്ങൾ സനാതനധർമത്തിന്റെ പേരിലാണ് ഇന്ത്യയിൽ അടിച്ചേൽപിക്കപ്പെടുന്നത്. ഇത് പ്രധാനമന്ത്രിക്ക് അറിയാത്തതാണോ?
ശൂദ്രൻ അക്ഷരം പഠിക്കരുതെന്നും പഞ്ചമജാതികൾക്കും സ്ത്രീകൾക്കും മനുഷ്യാവകാശങ്ങളില്ലെന്നും പ്രധാനമന്ത്രി കരുതുന്നുണ്ടോ? ശ്രീനാരായണഗുരു പോലെയുള്ള ഹിന്ദുമതപരിഷ്‌കർത്താക്കളെ ബിജെപി തള്ളിപ്പറയുമോ? ഗുരു സനാതനധർമത്തെ തള്ളിപ്പറഞ്ഞുവല്ലോ.
നവോഥാന പ്രസ്ഥാന മൂല്യങ്ങളുമായി ഇന്ന് ഹിന്ദു മതവിശ്വാസിക്ക് ജീവിക്കാമോ? ഇനി സനാതനധർമ ആശയങ്ങൾ പരിഷ്‌കരിക്കപ്പെടാവുന്നത് ആണെങ്കിൽ ഏതൊക്കെ പരിഷ്‌കരിക്കാം? ബ്രാഹ്മണാധിപത്യം പരിഷ്‌കരിക്കപ്പെടാവുന്നതാണോബേബി ആരാഞ്ഞു.
