വോട്ട് ചെയ്യാൻ ബൂത്തിൽ കയറിയ ആളുടെ മുഖത്ത് കള്ളലക്ഷണം; ഞൊടിയിടയിൽ വിരലിലെ ആ അടയാളം പണികൊടുത്തു; സ്ഥലത്ത് പോലീസ് അടക്കം പാഞ്ഞെത്തി; കൈയ്യോടെ പൊക്കി

തൃശ്ശൂർ: കള്ളവോട്ട് ചെയ്യാൻ ശ്രമിച്ച ഒരാളെ വടക്കാഞ്ചേരി നഗരസഭയിലെ 20-ാം ഡിവിഷനിൽ നിന്ന് പോലീസ് അറസ്റ്റ് ചെയ്തു. മങ്കര തരു പീടികയിൽ നിന്നുള്ള 42 വയസ്സുകാരനായ അൻവറാണ് പിടിയിലായത്.

മങ്കര സ്വദേശിയായ ഇയാൾക്ക് കുളപ്പുള്ളിയിൽ വോട്ടർ പട്ടികയിൽ പേരുണ്ടായിരുന്നു. അവിടെ വോട്ട് രേഖപ്പെടുത്തിയ ശേഷം, ഇന്ന് വീണ്ടും വോട്ട് ചെയ്യാൻ ശ്രമിക്കുന്നതിനിടെയാണ് പിടിക്കപ്പെട്ടത്. ഇയാളുടെ വിരലിലെ പഴയ മഷി അടയാളം ശ്രദ്ധയിൽപ്പെട്ട ഉദ്യോഗസ്ഥർക്ക് സംശയം തോന്നിയതോടെയാണ് കള്ളവോട്ട് ശ്രമം പൊളിഞ്ഞത്.

പ്രിസൈഡിങ് ഓഫീസറുടെ പരാതിയുടെ അടിസ്ഥാനത്തിൽ പോലീസ് അൻവറിനെ കസ്റ്റഡിയിലെടുത്തു. വടക്കൻ കേരളത്തിലെ ഏഴ് ജില്ലകളിൽ തദ്ദേശ തിരഞ്ഞെടുപ്പിൻ്റെ രണ്ടാം ഘട്ടം പുരോഗമിക്കവെയാണ് ഈ സംഭവം.