വനിതാ ഡോക്ടറെ നടുറോഡിൽ വെച്ച് കടന്നുപിടിക്കാൻ ശ്രമം; ബസ്സിറങ്ങി വന്ന ഡോക്ടറെ കൈയിൽ കയറി പിടിച്ചു; എതിർത്തപ്പോൾ ആക്രമണം; തിരുവനന്തപുരത്ത് 57 കാരൻ പിടിയിൽ

കിളിമാനൂർ:സംസ്ഥാനപാതയിൽ കിളിമാനൂർ മിനി സിവിൽസ്റ്റേഷന് സമീപം വനിതാ ഡോക്ടറെ വഴിയിൽ തടഞ്ഞുനിർത്തി അപമാനിക്കാൻ ശ്രമം.റോഡിൽ വെച്ച് ഡോക്ടറെ കയറി പിടിക്കുകയും ആക്രമിക്കുകയും ചെയ്തയാളെ അറസ്റ്റ് ചെയ്തു.നഗരൂർ, കടവിള, പുല്ലുതോട്ടം വിളയിൽ പുത്തൻവീട്ടിൽനിന്ന് ചാരുപാറ, തയ്യിങ്കളികുന്നിൽ വീട്ടിൽ താമസിക്കുന്ന മനോഹരൻ എന്ന് വിളിക്കുന്ന ശശികുമാർ (57) ആണ് പിടിയിലായത്.ബുധനാഴ്ച രാവിലെ എട്ടു മണിയോടെയായിരുന്നു സംഭവം.ബസിൽ നിന്നിറങ്ങി റോഡരികിലൂടെ നടന്നുവരുകയായിരുന്ന ഡോക്ടറെ എതിർവശത്ത് നിന്നുവന്ന പ്രതി കൈയിൽ കടന്നുപിടിക്കുകയായിരുന്നു.

അപമാനിക്കാൻ ശ്രമിക്കുന്നതിനിടെ യുവ ഡോക്ടർ കുട ഉപയോഗിച്ച് തടയാൻ ശ്രമിച്ചു.ഇതോടെ പ്രകോപിതനായ പ്രതി,ഡോക്ടറെ ആക്രമിക്കാൻ ശ്രമിച്ചു.യുവതിയുടെ ബഹളം കേട്ട് നാട്ടുകാർ കൂടുമെന്നായപ്പോൾഇയാൾ ഓടി രക്ഷപ്പെടുകയായിരുന്നു.ഓടിക്കൂടിയ നാട്ടുകാർ വിവരം കിളിമാനൂർ പൊലീസിൽ അറിയിച്ചു.തുടർന്നാണ് അന്വേഷണം നടത്തിയ പൊലീസ് പ്രതിയെ പിടികൂടിയത്.കിളിമാനൂർ ഐ.എസ്.എച്ച്.ഒ. എസ്.സനൂജ്, എസ്. ഐ. വിജിത്ത് കെ.നായർ, സുനിൽകുമാർ, എഎസ്ഐ. ഷജിം, എസ്.സി.പി.ഒ. ഷംനാദ്, സി.പി.ഒ. രാജേഷ് എന്നിവർചേർന്നാണ് പ്രതിയെ പിടികൂടിയത്.ഇയാളെ കോടതി റിമാൻഡ് ചെയ്തു.