കോഴിക്കോട്: എൻഐടിക്ക് സമീപം വെള്ളലശേരിയിൽ വൻ എംഡിഎംഎ വേട്ട. കാറിൽ കടത്തുകയായിരുന്ന കാൽ കിലോയിലധികം എംഡിഎംഎയുമായി യുവാവിനെ അറസ്റ്റ് ചെയ്തു. എക്സൈസ് കമീഷണറുടെ ഉത്തര മേഖലാ സ്‌ക്വാഡും കോഴിക്കോട് ഇന്റലിജൻസ് ബ്യൂറോയും എക്സൈസ് സ്പെഷ്യൽ സ്‌ക്വാഡും സംയുക്തമായി നടത്തിയ പരിശോധനയിലാണ് 268 ഗ്രാം എംഡിഎംഎയുമായി കുന്നമംഗലം പാലിശേരി സ്വദേശി മലയിൽ വീട്ടിൽ ഷറഫുദ്ദീനെ (34) എക്സൈസ് ഇൻസ്പെക്ടർ കെ എൻ റിമേഷും സംഘവും അറസ്റ്റ് ചെയ്തത്.
ബംഗളൂരുവിൽനിന്ന് കടത്തിക്കൊണ്ടുവന്ന വിവിധ രൂപത്തിലുള്ള എംഡിഎംഎ ഇയാളിൽനിന്ന് കണ്ടെടുത്തു. ഹ്യുണ്ടായ് ക്രെറ്റ കാറിൽ താമസസ്ഥലത്തേക്ക് വരുമ്പോഴായിരുന്നു അറസ്റ്റ്. മലപ്പുറം, കോഴിക്കോട് ജില്ലകളിൽ എംഡിഎംഎ മൊത്തക്കച്ചവടം ചെയ്യുന്നവരിൽ പ്രധാനിയാണ് പ്രതി. പുതുവർഷ ആഘോഷങ്ങൾക്കായി മയക്കുമരുന്ന് എത്തിക്കുന്നത് തടയാനുള്ള സ്പെഷ്യൽ ഡ്രൈവിന്റെ ഭാഗമായി നഗരത്തിൽ വിവിധ ഭാഗങ്ങളിൽ പരിശോധനകൾ നടത്തുന്നുണ്ട്. കോഴിക്കോട് എൻഐടി ക്യാമ്പസ് പരിസരത്ത് കാറിൽ കറങ്ങി നടന്നാണ് ഇയാളുടെ മയക്കുമരുന്ന് വ്യാപാരം.
ഉത്തരമേഖല എക്സൈസ് കമീഷണർ സ്‌ക്വാഡിലെ എക്സൈസ് ഇൻസ്പെക്ടർമാരായ പി കെ മുഹമ്മദ് ഷഫീഖ്, ടി ഷിജുമോൻ, സിവിൽ എക്സൈസ് ഓഫീസർമാരായ കെ എസ് അരുൺകുമാർ, അജിത്ത്, അർജുൻ വൈശാഖ്, ഇ അഖിൽദാസ്, കോഴിക്കോട് ആന്റി നർക്കോട്ടിക് സ്‌ക്വാഡ് അംഗങ്ങളായ പ്രിവന്റീവ് ഓഫീസർ പി കെ അനിൽകുമാർ, വി പി ശിവദാസൻ, സിവിൽ എക്സൈസ് ഓഫീസർമാരായ വിപിൻ, റഹൂഫ്, ഡ്രൈവർ പ്രബീഷ് എന്നിവരും സംഘത്തിലുണ്ടായിരുന്നു.
