കൊച്ചി: എക്‌സൈസും പൊലീസും നടത്തിയ പരിശോധനയിൽ കൊച്ചി, കോഴിക്കോട്, കണ്ണൂർ എന്നിവിടങ്ങളിൽ വൻതോതിൽ ലഹരിവസ്തുക്കൾ പിടികൂടി.30 ഗ്രാം എംഡിഎംഎയും 35 എൽഎസ് ഡി സ്റ്റാമ്പുകളുമാണ് കോഴിക്കോട് പാലാഴിയിലെ അപ്പാർട്ട്‌മെന്റിൽ നിന്നുംപിടികൂടിയത്. കോഴിക്കോട് പാലാഴിയിലെ അപ്പാർട്ട്‌മെന്റിൽ നിന്നാണ് ലഹരി മരുന്ന് പിടികൂടിയത്.
ഒരാളെ കസ്റ്റഡിയിൽ എടുത്തിട്ടുണ്ട്. അപ്പാർട്ട്‌മെന്റ് കേന്ദ്രീകരിച്ച് ലഹരി മരുന്ന് കൈമാറ്റം നടക്കുന്നതായിട്ടാണ് വിവരം ലഭിച്ചത്. രഹസ്യ വിവരത്തിന്റെ അടിസ്ഥാനത്തിലാണ് ഡാൻസാഫും ചേവായൂർ പൊലീസും ചേർന്നാണ് അപ്പാർട്ട്‌മെന്റിൽ പരിശോധന നടത്തിയത്.
അതേസമയം,കണ്ണൂർ പനയത്താം പറമ്പിൽ നിന്നും ഏഴു കിലോ കഞ്ചാവ് പിടികൂടി. പാലയോട് സ്വദേശി താഴെ വീട്ടിൽ അഷ്‌റഫ് ആണ് കഞ്ചാവുമായി പിടിയിലായത്. ചാലോട്, മട്ടന്നൂർ ഭാഗങ്ങളിൽ വിൽപ്പനക്കാർക്ക് കഞ്ചാവ് എത്തിച്ച് കൊടുക്കുന്ന ആളാണ് അഷ്‌റഫ് എന്ന് എക്‌സൈസ് ഉദ്യോഗസ്ഥർ പറഞ്ഞു.
കൊച്ചിയിൽ അസം സ്വദേശിയാണ് മയക്കുമരുന്നുമായി എക്‌സൈസിന്റെ പിടിയിലായത്.പത്ത് ലക്ഷം രൂപ വില വരുന്ന നാൽപ്പത് ഗ്രാം ബ്രൗൺ ഷുഗർ ഇയാളിൽ നിന്ന് കണ്ടെടുത്തു.
