കഴക്കൂട്ടത്ത് അമ്മൂമ്മയുടെ കൈയിലിരുന്ന പിഞ്ചു കുഞ്ഞിനെ തട്ടിക്കൊണ്ടുപോകാന്‍ ശ്രമം; അതിഥി തൊഴിലാളി അറസ്റ്റില്‍

തിരുവനന്തപുരം: കഴക്കൂട്ടത്ത് അമ്മൂമ്മയുടെ കൈയിലിരുന്ന ഒന്‍പതുമാസം പ്രായമുള്ള കുഞ്ഞിനെ തട്ടിക്കൊണ്ടുപോകാന്‍ ശ്രമം. മദ്യ ലഹരിയില്‍ ഇരുവരേയും ആക്രമിച്ച അതിഥി തൊഴിലാളിയെ പോലിസ് അറസ്റ്റ് ചെയ്തു. ആക്രമണത്തില്‍ കുഞ്ഞിനും കുഞ്ഞിന്റെ അമ്മൂമ്മയ്ക്കും പരിക്കേറ്റു. ഇവരെ സ്വകാര്യ ആശുപത്രിയില്‍ പ്രവേശിപ്പിച്ചു.

തിങ്കളാഴ്ച രാത്രി ഏഴരയോടെ കഴക്കൂട്ടം ജങ്ഷനിലാണ് സംഭവം. മെഡിക്കല്‍ സ്റ്റോറില്‍ മരുന്നു വാങ്ങാനെത്തിയപ്പോഴായിരുന്നു ആക്രമണം. മദ്യലഹരിയിലായിരുന്ന ആസാം സ്വദേശി നൂറുല്‍ ആദം (47) ആണ് പിടിയിലായത്. കുട്ടിയെ തട്ടിയെടുക്കാന്‍ ശ്രമിക്കവേ തടഞ്ഞപ്പോഴാണ് മുത്തശ്ശിക്ക് പരിക്കേറ്റത്. പിടിവലിയില്‍ കുഞ്ഞിനും പരിക്കുപറ്റി. സംഭവം കണ്ട നാട്ടുകാര്‍ ഇയാളെ തടഞ്ഞുവച്ച് പോലീസിലേല്‍പ്പിക്കുകയായിരുന്നു.