മലപ്പുറം: താൻ പഠിച്ച സ്‌കൂളിലെ മൂന്നു അദ്ധ്യാപികമാരുടെ ചിത്രങ്ങൾ അശ്ലീലമായി മോർഫ് ചെയ്ത് ഇൻസ്റ്റഗ്രാമിൽ പ്രചരിപ്പിച്ച പൂർവ്വവിദ്യാർത്ഥി അറസ്റ്റിൽ. മലപ്പുറത്തെ സ്‌കൂളിലെ മൂന്നു അദ്ധ്യാപികമാരുടെ മോർഫ് ചെയ്ത അശ്ലീല ചിത്രങ്ങൾ ഇൻസ്റ്റഗ്രാമിലൂടെ പ്രചരിപ്പിച്ച മലപ്പുറം കോട്ടപ്പടി ചെറാട്ട്കുഴി മഞ്ചേരി തൊടിയിൽ ബിനോയി (26)ആണ് അറസ്റ്റിലായത്.
സ്‌കൂളിലെ പ്രധാന അദ്ധ്യാപികയുടെയും മറ്റു രണ്ടുഅദ്ധ്യാപികമാരുടെയും ഫോട്ടോകൾ അവരുടെ സോഷ്യൽ മീഡിയാ പേജൽനിന്നും എടുത്ത ശേഷം മുഖം മാത്രം എടുത്ത അശ്ലീല ഫോട്ടോകളിൽ മോർഫ്ചെയ്താണു പ്രചരിപ്പിച്ചതെന്നു പൊലീസ് പറഞ്ഞു. ഇതിനായി സ്‌കൂളിലെ പ്രധാന അദ്ധ്യാപികയുടെ പേരിൽ വ്യാജ ഇൻസ്റ്റഗ്രാം അക്കൗണ്ട് ഉണ്ടാക്കുകയും ഇതിൽ ഇവ പോസ്റ്റ് ചെയ്യുകയും ചെയ്തിട്ടുണ്ട്.
2014-2016 വർഷങ്ങളിൽ സ്‌കൂളിലെ പ്ലസ് ടു വിദ്യാർത്ഥിയായിരുന്നു പ്രതിയായ ബിനോയി. പ്രതിയുടെ കൈവശത്തിൽ ഉണ്ടായിരുന്ന ലാപ്ടോപ്പിൽ നിന്നും മൊബൈൽ ഫോണിൽ നിന്നും ഇന്റർനെറ്റിൽ നിന്നും മറ്റും ഡൗൺലോഡ് ചെയ്ത് നൂറുകണക്കിന് അശ്ലീല ചിത്രങ്ങളും മോർഫു ചെയ്ത ചിത്രങ്ങളും മലപ്പുറം സൈബർ പൊലീസ് കണ്ടെടുത്തിട്ടുണ്ട്. വ്യാജമായ അക്കൗണ്ടിലൂടെ അദ്ധ്യാപികമാരെ അപകീർത്തി പ്പെടുത്തുന്നതിനും ഈ അക്കൗണ്ട് ഫോളോ ചെയ്യുന്ന ആളുകളുടെ എണ്ണം കൂട്ടുന്നതിനുമായാണ് ഇത്തരത്തിൽ ചെയ്തതെന്നു പ്രതി സമ്മതിച്ചതായി പൊലീസ് പറഞ്ഞു.
വ്യാജമായ ഈ പ്രൊഫൈലിൽ രണ്ടായിരത്തോളം ഫോളോവേഴ്സ് ഉണ്ട്. മറ്റാരുടെയെങ്കിലും പ്രേരണയോ സഹായമോ ഇക്കാര്യത്തിൽ പ്രതിക്കു ലഭിച്ചിട്ടുണ്ടോയെന്നും പൊലീസ് പരിശോധിക്കുന്നുണ്ട്. പുതുതായി ചാർജെടുത്ത മലപ്പുറം അഡീഷണൽ എസ്‌പി: പി.എം. പ്രദീപ്കുമാറിന് ലഭിച്ച പരാതിയിലാണു ഉടനടി നടപടിയുണ്ടായത്.
എ.എസ്‌പിയുടെ നിർദ്ദേശപ്രകാരം മലപ്പുറം ഡിവൈ.എസ്‌പി അബ്ദുൽ ബഷീർ, സൈബർ പൊലീസ് സ്റ്റേഷൻ ഇൻസ്പെക്ടർ എം.ജെ. അരുൺ എന്നിവരുടെ നേതൃത്വത്തിൽ, സൈബർ പൊലീസ് സ്റ്റേഷൻ എസ്‌ഐ അബ്ദുൽലത്തീഫ്, എഎസ്ഐ റിയാസ് ബാബു, സീനിയർ സിവിൽ പൊലീസ് ഉദ്യോഗസ്ഥനായ അശോക് കുമാർ, മുഹമ്മദ് ഷാഫി എന്നിവർ ചേർന്ന് നടത്തിയ സമഗ്രമായ അന്വേഷണത്തിലാണ് പ്രതി അറസ്റ്റിലായത്. മറ്റു നടപടികൾക്ക് ശേഷം പ്രതിയെ നാളെ ചീഫ് ജുഡീഷ്യൽ മജിസ്ട്രേറ്റ് മുമ്പാകെ ഹാജരാക്കും.
