സബ് രജിസ്ട്രാര്‍ ഓഫിസില്‍ അതിക്രമിച്ചു കയറി; ജീവനക്കാരിയെ കത്തി വെച്ച് കൊലപ്പെടുത്താന്‍ ശ്രമം; ഭർത്താവ് അറസ്റ്റിൽ
നെടുങ്കണ്ടം: സബ് രജിസ്ട്രാര്‍ ഓഫിസില്‍ അതിക്രമിച്ചു കയറി യുവതിക്കെതിരെ ഭർത്താവിന്റെ വധശ്രമം. സംഭവം ഉടുമ്പൻചോല സബ് രജിസ്ട്രാർ ഓഫിസില്‍. കുടുംബ വഴക്കിനെത്തുടര്‍ന്നാണ് രജിസ്ട്രാര്‍ ഓഫിസ് ജീവനക്കാരി കൂടിയായ ഭാര്യയുടെ കഴുത്തില്‍ കത്തിവെച്ച് കൊലപ്പെടുത്താന്‍ ശ്രമിച്ച പ്രതി ശ്രമിച്ചത്. കേസിൽ നെടുങ്കണ്ടം മോഡീഹൗസില്‍ മനോജിനെയാണ്(54) പോലീസ് അറസ്റ്റ് ചെയ്തത്.
തിങ്കളാഴ്ച ഓഫിസ് പ്രവര്‍ത്തനസമയത്തായിരുന്നു പ്രതിയുടെ അതിക്രമം. മുണ്ടിയെരുമയിൽ പ്രവർത്തിക്കുന്ന ഉടുമ്പൻചോല സബ് രജിസ്ട്രാർ ഓഫിസില്‍ കയറി ഇയാൾ ഭാര്യയുടെ മുടിക്കുത്തിന് പിടിച്ച് വലിച്ചിഴക്കുകയും, ശേഷം കത്തികൊണ്ട് കൊലപ്പെടുത്താന്‍ ശ്രമിക്കുകയുമായിരുന്നുവെന്ന് പോലീസ് പറഞ്ഞു.
അതേസമയം, മാസങ്ങള്‍ക്ക് മുമ്പ് ഇയാള്‍ കട്ടപ്പന സബ് രജിസ്ട്രാര്‍ ഓഫിസില്‍ കയറി മറ്റൊരു ജീവനക്കാരനെ മര്‍ദിച്ചിരുന്നു. അതുമായി ബന്ധപ്പെട്ട് കട്ടപ്പന പോലീസിൽ കേസുള്ളതായും പോലീസ് വ്യക്തമാക്കി. നെടുങ്കണ്ടം കോടതിയില്‍ ഹാജരാക്കിയ പ്രതിയെ റിമാൻഡ് ചെയ്തു. നെടുങ്കണ്ടം എസ്.ഐ ടി.എസ്. ജയകൃഷ്ണന്റെ നേതൃത്വത്തിലായിരുന്നു പ്രതിയെ അറസ്റ്റ് ചെയ്തത്.
