കാഞ്ഞിരപ്പള്ളി: അടുത്ത വീട്ടിലെത്തിയ പൊലീസിനെ കണ്ട് ഭയന്ന് നിലവിളിച്ചോടിയ മൂന്ന് വയസ്സുകാരന്റെ പേടി മാറ്റിയത് പിന്നീട് സ്റ്റേഷനിലെത്തിച്ച്. പൊലീസുകാർ കുട്ടിയെ സ്‌നേഹത്തോടെ ലാളിക്കുകയും മിഠായി നൽകുകയും ചെയ്തതോടെ എസ്‌ഐയുടെ മടിയിൽ കയറി ഇരിപ്പായി ദേവജിത്ത് എന്ന കുരുന്ന്.
വിഴിക്കിത്തോട് ചെറുവള്ളിയിൽ അനിൽകുമാറിന്റെ നയനയുടെയും ഇളയമകനാണ് ദേവജിത്ത്. അടുത്ത വീട്ടിൽ കേസ് അന്വേഷിക്കാൻ എസ്‌ഐ അരുൺ തോമസും സംഘവും എത്തിയതു കണ്ട് ഭയന്ന കുട്ടി കരയാൻ തുടങ്ങി. രാത്രിയും കരച്ചിൽ നിർത്താതെ വന്നതോടെ അനിൽകുമാർ എസ്‌ഐയെ വിവിരം അറിയിച്ചു.
എസ്‌ഐ പറഞ്ഞതനുസരിച്ച് പിറ്റേന്ന് കുട്ടിയെ അച്ഛനും അമ്മയും സ്റ്റേഷനിൽ കൊണ്ടുവന്നു. പൊലീസുകാർ എടുത്തും മടിയിലിരുത്തിയും മിഠായി നൽകിയും ഒരു മണിക്കൂറോളം സമയം സ്റ്റേഷനിൽ ചെലവിട്ടപ്പോഴേക്കും ദേവജിത്തിന്റെ പേടി മാറി പൊലീസുമായി ചങ്ങാത്തത്തിലായി. എസ്‌ഐ അരുൺ തോമസ് ദേവജിത്തിനെ മടിയിലിരുത്തി ലാളിക്കുന്ന ദൃശ്യങ്ങൾ സമൂഹമാധ്യമങ്ങളിൽ വൈറലായി.
