തിരുവല്ല: നമ്പർ പ്ലേറ്റിൽ കൃത്രിമം കാണിച്ച ബൈക്ക് മോട്ടോർ വാഹന വകുപ്പ് പിടികൂടി. കാന്തിക ശക്തി ഉപയോഗിച്ച് മുന്നോട്ടും പിന്നോട്ടും അതിവേഗം ചലിപ്പിക്കാൻ കഴിയുന്ന തരത്തിൽ രൂപമാറ്റം വരുത്തിയ നമ്പർ പ്ലേറ്റ് ഉള്ള ബൈക്കാണ് മോട്ടർ വാഹന വകുപ്പ് എൻഫോഴ്‌സ്‌മെന്റ് വിഭാഗം വാഹന പരിശോധനയ്ക്കിടെ പിടികൂടിയത്. ചെങ്ങന്നൂർ തിരുവൻവണ്ടൂർ സ്വദേശി അരുൺ കുമാറിന്റെ ഉമസ്ഥതയിലുള്ള ബൈക്കാണ് പിടികൂടിയത്.
ഇന്നലെ രാവിലെ ഇടിഞ്ഞില്ലത്തിനു സമീപം നടത്തിയ വാഹന പരിശോധനയിലാണ് ബൈക്ക് പിടികൂടിയത്. ബൈക്കിന്റെ പിൻവശത്തെ നമ്പർ പ്ലേറ്റിന്റെ മുൻവശത്തും പിൻവശത്തുമായി നാല് കാന്ത കഷണങ്ങൾ ഘടിപ്പിച്ചാണ് നമ്പർ പ്ലേറ്റ് അതിവേഗം ചലിപ്പിച്ചിരുന്നത്. മോട്ടർ വാഹന വകുപ്പിന്റെയോ പൊലീസിന്റെയോ വാഹന പരിശോധന ശ്രദ്ധയിൽപ്പെട്ടാൽ ബൈക്ക് ഞൊടിയിടയിൽ മുന്നിലേക്കോ പിന്നിലേക്കോ ചലിപ്പിച്ച് നമ്പർ പ്ലേറ്റ് അദൃശ്യമാക്കാവുന്ന തരത്തിലാണ് പിടികൂടിയ ബൈക്കിലെ സംവിധാനം.
നമ്പർ പ്ലേറ്റിൽ ഇത്തരത്തിലുള്ള കൃത്രിമം പത്തനംതിട്ട ജില്ലയിൽ പിടികൂടുന്നത് ഇത് ആദ്യമായാണെന്ന് മോട്ടർ വാഹന വകുപ്പ് ഉദ്യോഗസ്ഥർ പറഞ്ഞു. വാഹനമോടിച്ചിരുന്ന പ്രവീൺകുമാറിന്റെ ലൈസൻസ് റദ്ദ് ചെയ്യുന്നത് അടക്കമുള്ള നിയമ നടപടികൾ സ്വീകരിക്കുമെന്നും ഉദ്യോഗസ്ഥർ പറഞ്ഞു.
