തിരുവനന്തപുരം: കുവൈത്തിലെ ജസീറ എയർവേയ്സ് തിരുവനന്തപുരം രാജ്യാന്തര വിമാനത്താവളത്തിൽനിന്ന് സർവീസ് തുടങ്ങുന്നു. ആദ്യഘട്ടത്തിൽ ആഴ്ചയിൽ രണ്ട് ദിവസമായിരിക്കും സർവീസ്. ഒക്ടോബർ 30 മുതലാണ് സർവീസ് തുടങ്ങുക. ആഴ്ചയിൽ മൂന്ന് ദിവസം ഇതേ സെക്ടറിൽ സർവീസ് നടത്തുന്ന കുവൈത്ത് എയർവേയ്സിനു പുറമേയാണ് ജസീറയുടെ സർവീസ്. ജസീറയുടെ കേരളത്തിലേക്കുള്ള രണ്ടാമത്തെ സർവീസ് ആണിത്.

തിരുവനന്തപുരത്തുനിന്ന് തിങ്കൾ, ബുധൻ ദിവസങ്ങളിൽ പുലർച്ചെ 2.50-നു പുറപ്പെട്ട് 5.55-ന് കുവൈത്തിലെത്തും. കുവൈത്തിൽനിന്ന് വൈകീട്ട് 6.25-ന് പുറപ്പെടുന്ന വിമാനം പുലർച്ചെ 2.05-ന് തിരുവനന്തപുരത്തെത്തും. 160 പേർക്കു യാത്ര ചെയ്യാവുന്ന എ 320 വിമാനമാണ് സർവീസിന് ഉപയോഗിക്കുക.

ബജറ്റ് എയർലൈനായ ജസീറയുടെ വരവോടെ ദക്ഷിണ കേരളത്തിലെയും തമിഴ്‌നാട്ടിലെയും യാത്രക്കാർക്ക് കുറഞ്ഞ ചെലവിൽ കുവൈത്ത് യാത്ര നടത്താനാകും.