മദ്യലഹരിയിൽ വനിതാ എസ്‌ഐയെ ആക്രമിച്ചവർ മാളയിൽ അറസ്റ്റിൽ

തൃശ്ശൂർ: മാളയിൽ മദ്യലഹരിയിൽ വനിത എസ്‌ഐയെ ആക്രമിച്ചവർ അറസ്റ്റിൽ. മാള പൊയ്യ ചക്കാട്ടിക്കുന്നിലെ മദ്യപസംഘമാണ് പൊലീസിനെ ആക്രമിച്ചത്. വനിത എസ്‌ഐയോട് അപമര്യാദയായി പെരുമാറിയ മദ്യപസംഘം. രണ്ട് ഉദ്യോഗസ്ഥരെ മർദ്ദിക്കുകയും ചെയ്തു. സംഭവത്തിൽ ചക്കാട്ടിക്കുന്ന് സ്വദേശി സുനി (36) , മഠത്തുംപടി സ്വദേശി സനോജ് (36) എന്നിവരെ പൊലീസ് അറസ്റ്റ് ചെയ്തു.

വൈകിട്ട് ഏഴരയോടെയായിരുന്നു സംഭവം. മാളാ ചക്കാട്ടിക്കുന്നിൽ രണ്ട് പേർ മദ്യപിച്ച് പ്രശ്‌നമുണ്ടാക്കുന്നതായി പൊലീസിന് പരാതി കിട്ടി. ഇതിനെ തുടർന്ന് പ്രിൻസിപ്പൾ എസ്‌ഐ അടക്കമുള്ള പൊലീസ് സംഘം സ്ഥലത്ത് എത്തിയപ്പോൾ ആണ് ഇവർക്ക് നേരെ ആക്രമണം ഉണ്ടായത്. വനിതാ എസ്‌ഐയെ അധിക്ഷേപിച്ച ഇവരെ ബലം പ്രയോഗിച്ച് പൊലീസ് കീഴ്‌പ്പെടുത്തുകയായിരുന്നു. ഉദ്യോഗസ്ഥരുടെ ജോലി തടസ്സപ്പെടുത്തിയതിനും സ്ത്രീകളെ അധിക്ഷേപിച്ചതിനും ഇവർക്കെതിരെ കേസെടുത്തിട്ടുണ്ട്.