'ഏറ്റവും അധികം പിൻവാതിൽ നിയമനങ്ങൾ'; പിണറായി വിജയനു പിൻവാതിൽ നിയമനങ്ങളുടെ ലോകകപ്പ് നൽകണമെന്ന് ഷാഫി പറമ്പിൽ

കൊല്ലം: പിൻവാതിൽ നിയമനങ്ങളുടെ ലോകകപ്പ് മുഖ്യമന്ത്രി പിണറായി വിജയനു നൽകണമെന്ന് യൂത്ത് കോൺഗ്രസ് സംസ്ഥാന പ്രസിഡന്റ് ഷാഫി പറമ്പിൽ എംഎൽഎ. ഏറ്റവും അധികം പിൻവാതിൽ നിയമനങ്ങൾ നടക്കുന്ന സംസ്ഥാനമായി കേരളം മാറി.

ഒഴിവു റിപ്പോർട്ട് ചെയ്യാൻ 4 സെക്കൻഡ് വൈകിപ്പിച്ചു സർക്കാർ ജോലി നഷ്ടപ്പെടുത്തിയ നിഷ ബാലകൃഷ്ണൻ എന്ന യുവതിക്കു നീതി നൽകണമെന്നാവശ്യപ്പെട്ടു യൂത്ത് കോൺഗ്രസ് ജില്ലാ കമ്മിറ്റി ചിന്നക്കട ഹെഡ് പോസ്റ്റ് ഓഫിസിനു മുന്നിൽ നടത്തുന്ന 24 മണിക്കൂർ നിരാഹാര സത്യഗ്രഹം ഉദ്ഘാടനം ചെയ്യുകയായിരുന്നു അദ്ദേഹം.

നിഷ ബാലകൃഷ്ണനു നിയമനം നൽകുന്നതുവരെ യൂത്ത് കോൺഗ്രസ് സംസ്ഥാന വ്യാപകമായി സമരം നടത്തും. മറ്റ് 13 ജില്ലകളിലും നിരാഹാര സമരം സംഘടിപ്പിക്കും. ഒഴിവു റിപ്പോർട്ടു ചെയ്യുന്നതു വൈകിപ്പിച്ച കുറ്റക്കാരായ ഉദ്യോഗസ്ഥർക്ക് എതിരെ നടപടി എടുക്കണം. നിഷയുടെ വിലാപം സർക്കാർ ഹൃദയം കൊണ്ടു കേൾക്കാൻ തയാറാകണമെന്നു അദ്ദേഹം പറഞ്ഞു.