കാസർകോട്: ലഹരിമരുന്ന് നൽകിയും പ്രലോഭിപ്പിച്ചും പത്തൊൻപതുകാരിയെ കൂട്ടബലാത്സംഗത്തിന് ഇരയാക്കിയ കേസിൽ അറസ്റ്റിലായവരുടെ എണ്ണം പത്തായി. ഞായർ, തിങ്കൾ ദിവസങ്ങളിലായി മൂന്നുപേരെ കൂടി ക്രൈംബ്രാഞ്ച് ഡിവൈ.എസ്‌പി. എ. സതീഷ്‌കുമാറിന്റെ നേതൃത്വത്തിൽ അറസ്റ്റ് ചെയ്തു.

കാസർകോട് കോട്ടക്കണ്ണിയിലെ വാടക ക്വാർട്ടേഴ്സിൽ താമസക്കാരിയും ഇടനിലക്കാരിയുമായ എന്മകജെ കുടുവാവീട്ടിലെ ബീഫാത്തിമ (42), ഉദുമ ഇച്ചിലങ്കാലിലെ ഫയാസ് മൊയ്തീൻ കുഞ്ഞി(29), മാങ്ങാട് ബാര ആര്യടുക്കത്തെ എൻ. മുനീർ (29) എന്നിവരെയാണ് അറസ്റ്റ് ചെയ്തത്.

സാമ്പത്തികമായി പിന്നാക്കം നിൽക്കുന്ന കുടുംബത്തിലെ കഷ്ടപ്പാടുകൾ ചൂഷണം ചെയ്താണ് പെൺകുട്ടിയെ പ്രതികൾ പീഡനങ്ങൾക്ക് ഇരയാക്കിയത്. ചെർക്കള, കാസർകോട്, മംഗളൂരു, തൃശ്ശൂർ തുടങ്ങിയ സ്ഥലങ്ങളിലുമെത്തിച്ച് ഒറ്റയ്ക്കും കൂട്ടമായും പീഡിപ്പിച്ചുവെന്നാണ് പരാതി.

തുടർച്ചയായുള്ള പീഡനം കാരണമുണ്ടായ ആരോഗ്യ-മാനസിക പ്രശ്നങ്ങളെ തുടർന്ന് ആശുപത്രിയിൽ ചികിത്സ തേടിയപ്പോൾ നടത്തിയ കൗൺസലിങ്ങിലാണ് പെൺകുട്ടി ഞെട്ടിപ്പിക്കുന്ന പീഡനവിവരം വെളിപ്പെടുത്തിയത്. തുടർന്നാണ് കാസർകോട് വനിതാ പൊലീസ് കേസെടുത്തതും തുടരന്വേഷണം ജില്ലാ ക്രൈംബ്രാഞ്ചിനു കൈമാറിയതും.

പീഡനപരമ്പരയുമായി ബന്ധപ്പെട്ട് ആറ് കേസുകളാണ് ഇതുവരെ എടുത്തിരിക്കുന്നത്. 18 പേർക്കെതിരെയാണ് കേസ്. മറ്റ് പ്രതികളെ അന്വേഷിച്ചു വരുകയാണെന്ന് പൊലീസ് പറഞ്ഞു. കേസിൽ അറസ്റ്റിലായ ഇടനിലക്കാരിയെ കോടതി റിമാൻഡ് ചെയ്തു. സംഭവത്തിൽ ഇടനിലക്കാരിയായ കാസർകോട് കോട്ടക്കണ്ണിയിലെ വാടക ക്വാർട്ടേഴ്സിൽ താമസക്കാരിയായ എന്മകജെ കുടുവാ ഹൗസിലെ ബീഫാത്തിമ (42)യാണ് റിമാൻഡിലായത്.

കാസർകോട്കൂട്ടബലാത്സംഗ കേസ്മൂന്ന് പ്രതികൾ

മറുനാടന്‍ മലയാളി

    മറുനാടന്‍ മലയാളി ബ്യൂറോ