തേക്കിൻകാട് മൈതാനിയിൽ 11 വർഷം മുമ്പ് നട്ട അത്യപൂർവ്വ ശിവകുണ്ഡല മരം പൂത്തു. വടക്കുന്നാഥന്റെ തെക്കേനടയുടെ സമീപം നട്ട അത്യപൂർവ്വമായ മരമാണ് പൂവിട്ടത്. ഒരു കായും ഉണ്ടായി. മരം പൂത്ത വാർത്തയറിഞ്ഞ് മരംനട്ട ഡോ.ഫ്രാൻസിസ് ആലപ്പാട്ട് ഇവിടേക്കെത്തി. താൻ നട്ട മരത്തിന്റെ പൂവും കായും അദ്ദേഹം സന്തോഷത്തോടെ നോക്കിക്കണ്ടു.

'കൈജീലിയ പിന്നാറ്റ' എന്ന ശാസ്ത്രീയ നാമമുള്ള ആഫ്രിക്കൻ പ്രദേശങ്ങളിൽ കാണുന്ന മരമാണ് ഇത്. ഏറെ വർഷങ്ങളായി സസ്യശാസ്ത്ര വിദ്യാർത്ഥികളുടെ പഠനവിഷയമായിരുന്ന പഴയ കൈജീലിയ മരം മറിഞ്ഞുവീണ് നശിച്ചപ്പോൾ എല്ലാവർക്കും വലിയ വേദനയായിരുന്നു. അതോടെയാമ് ആലപ്പാട്ടച്ചൻ അതിന്റെ ഒരു തൈക്കായി അന്വേഷിച്ചിറങ്ങിയത്. അതിനായി കേരളത്തിൽ അങ്ങോളം ഇങ്ങോളം അദ്ദേഹം അന്വേഷിച്ചു. എന്നിട്ടും ഫലം ഉണ്ടായില്ല.

അന്വേഷണത്തിനൊടുവിൽ പീച്ചി കെഎഫ്ആർഐ കേന്ദ്രത്തിലെ ഡോക്ടർ സുജനപാലും ഡോക്ടർ ഒ. എൽ പയസും ചേർന്ന് ബെംഗളൂരുവിൽ നിന്ന് അച്ചന് ഒരു തൈ കൊണ്ടുവന്നു കൊടുത്തു. 2011 ജനുവരി ഒന്നാം തീയതി മന്ത്രി കെ.പി. രാജേന്ദ്രൻ, അന്നത്തെ ജില്ലാ കളക്ടർ പ്രേമചന്ദ്രക്കുറുപ്പ്, ദേവസ്വം ഭാരവാഹികൾ എന്നിവരുടെ സാന്നിധ്യത്തിൽ നശിച്ചുപോയ വൃക്ഷത്തിന്റെ സ്ഥലത്തുതന്നെ പുതിയ തൈവച്ചു. നനച്ചു വളർത്താനും പൂരങ്ങളിൽ ചവിട്ടി ഒടിഞ്ഞു പോകാതിരിക്കാനും വലിയ സുരക്ഷയാണ് മരത്തിന് നൽകിയിരുന്നത്.

പ്രതിസന്ധികളെല്ലാം അതിജീവിച്ചാണ് ഈ വർഷം അപൂർവ വൃക്ഷം ഞാണുകിടക്കുന്ന പൂക്കുലകൾ വടക്കുന്നാഥനു സമർപ്പിച്ചത്. കുമ്പളങ്ങയുടെ വലുപ്പമുള്ള ഒരു കായും ഇതിലുണ്ടായി. ഇതറിഞ്ഞ അച്ചൻ താൻ നട്ടുവളർത്തിയ മരത്തിന്റെ ഫലം കാണാൻ പരസഹായത്തോടെ പൂരപ്പറമ്പിലെത്തുകയായിരുന്നു. തിരുവമ്പാടി ദേവസ്വം പ്രസിഡന്റ് സുന്ദർ മേനോനും അദ്ദേഹത്തോടൊപ്പം ഉണ്ടായിരുന്നു.

വൃക്ഷം സംരക്ഷിക്കപ്പെടണമെന്നുള്ള അപേക്ഷയുമായാണ് അദ്ദേഹം മടങ്ങിയത്. ഇല, തൊലി, വേര് എന്നിവയെല്ലാം ഔഷധഗുണമുള്ളവയായതിനാലും വിത്തുല്പാദനം വളരെ കുറവായതിനാലും ഇതിന്റെ തൈകൾ വളർത്തിയെടുക്കാൻ ഏറെ ബുദ്ധിമുട്ടാണ്. ചിലർ അലങ്കാരത്തിനായി വളരെനാൾ അഴുകാതെയിരിക്കുന്ന ഈ കായ് പറിച്ച് കൊണ്ടുപോകുന്നതും ഇതിന്റെ വംശവർധനവിന് തടസ്സമാണ്.

തേക്കിൻകാട് മൈതാനിശിവകുണ്ഡല മരം പൂത്തു