മാവിനങ്ങൾക്ക് ജനിതക സംരക്ഷണ കേന്ദ്രം ഒരുക്കി കണ്ണൂർ ജില്ലാപഞ്ചായത്ത്; കുറ്റിയാട്ടൂരിൽ ഒരുങ്ങുന്നത് രണ്ടര ഏക്കർ സ്ഥലത്ത് സംരക്ഷണ കേന്ദ്രം

 പയ്യന്നൂർ: ഭൗമശാസ്ത്രപദവി നേടിയ കുറ്റിയാട്ടൂർമാവുകൾ ഉൾപ്പെടെ സംരക്ഷിക്കുന്നതിനായി നാടൻ മാവിനങ്ങൾക്ക് ജനിതക സംരക്ഷണ കേന്ദ്രം ഒരുക്കി ജില്ലാ പഞ്ചായത്ത്. ജില്ലാ പഞ്ചായത്ത് കുറ്റിയാട്ടൂർ ചട്ടുകപ്പാറയിൽ ആരംഭിക്കുന്ന കൺവെൻഷൻ സെന്ററായ ആരൂഢത്തിന് ചുറ്റുമുള്ള രണ്ടര ഏക്കറിലാണ് സംരക്ഷണ കേന്ദ്രം ഒരുങ്ങുന്നത്.

മാവിൻ തൈകളുടെ നടീലും നാടൻ മാവുകളുടെ ഒട്ടു തൈ വിതരണത്തിന്റെ ഉദ്ഘാടനവും ജനിതക വൈവിധ്യ സംരക്ഷണ കേന്ദ്രത്തിൽ ജില്ലാ പഞ്ചായത്ത് പ്രസിഡണ്ട് പി പി ദിവ്യ നിർവ്വഹിച്ചു. അൻപതിനം നാട്ടുമാവിൻ തൈകളാണ് ഇവിടെ നട്ടത്. തരിശായി കിടക്കുന്ന ഈ പ്രദേശത്തെ ഹരിതാഭമാക്കുക, അന്യം നിന്നു പോകുന്ന നാട്ടുമാവുകളെ സംരക്ഷിക്കുക എന്നിവയാണ് ലക്ഷ്യം.

കേരളത്തിന്റെ വിവിധ ഭാഗങ്ങളിൽ നിന്നായി ശേഖരിക്കുന്ന മാവുകളാണ് നട്ടു പരിപാലിക്കുക. 'നാട്ടുമാഞ്ചോട്ടിൽ' കൂട്ടായ്മയാണ് മാവുകളെ വർഗീകരിച്ച് എത്തിക്കുന്നതും സംരക്ഷിക്കുന്നതും. നാട്ടുമാവുകളുടെ സംരക്ഷണത്തിനായി ജില്ലാ പഞ്ചായത്ത് ആവിഷ്‌കരിച്ച നാട്ടുമാവിൻ തോട്ടം പദ്ധതിയിലൂടെ തയ്യാറാക്കുന്ന നാട്ടുമാവുകളും രണ്ടാംഘട്ട പ്രവർത്തനമായി ഇവിടെ നട്ട് സംരക്ഷിക്കും.

പദ്ധതി പൂർത്തിയാകുന്നതോടെ നൂറിലധികം നാട്ടുമാവുകളുടെ സംരക്ഷണ കേന്ദ്രമായി ഇവിടം മാറുമെന്നാണ് പ്രതീക്ഷ. ആഗോളതലത്തിൽതന്നെ പ്രശസ്തമാണ് കുറ്റിയാട്ടൂർമാവുകൾ. ഇതിന് ഭൗമശാസ്ത്രപദവിയും ലഭിച്ചിട്ടുണ്ട്.

ജില്ലാ പഞ്ചായത്ത് വൈസ് പ്രസിഡന്റ് അഡ്വ. ബിനോയ്കുര്യൻ അധ്യക്ഷനായി. നാട്ടുമാവിൻചോട്ടിൽ കൂട്ടായ്മയുടെ ഫൗണ്ടർ കോ ഓർഡിനേറ്റർ ഷൈജു മാച്ചാത്തി പദ്ധതി വിശദീകരിച്ചു. ജില്ലാപഞ്ചായത്ത് സ്ഥിരം സമിതി അധ്യക്ഷരായ യു പി ശോഭ, അഡ്വ. കെ കെ രത്‌നകുമാരി, അഡ്വ. ടി സരള, മയ്യിൽ പഞ്ചായത്ത് പ്രസിഡണ്ട് എം വി അജിത, കുറ്റിയാട്ടൂർ പഞ്ചായത്ത് പ്രസിഡണ്ട് പി പി റെജി, ജില്ലാ പഞ്ചായത്ത് അംഗം എൻ വി ശ്രീജിനി, ജില്ലാ പഞ്ചായത്ത് സെക്രട്ടറി അബ്ദുൽ ലത്തീഫ്, കൃഷി ഡെപ്യൂട്ടി ഡയറക്ടർ പി കെ ബേബി റീന എന്നിവർ പങ്കെടുത്തു.