ചേർത്തല: വീടിനടുത്ത് കളിച്ചുകൊണ്ടിരുന്ന അയൽവാസിയായ ഒമ്പതു വയസുകാരിക്കുനേരേ ലൈംഗികാതിക്രമം നടത്തിയ 47 വയസുകാരനു തടവും പിഴയും. പട്ടണക്കാട് ഗ്രാമപഞ്ചായത്ത് എട്ടാം വാർഡിൽ കണിയാം വെളിവീട്ടിൽ പ്രമീഷ്(അമ്പിളിക്കുട്ടൻ-47)നെയാണ് കോടതി മൂന്നു വർഷം തടവിനും 25000 പിഴയടക്കാനും ശിക്ഷിച്ചത്. ചേർത്തല ഫാസ്റ്റ് ട്രാക്ക് സ്‌പെഷ്യൽ പോക്‌സോ കോടതിയുടേതാണ് വിധി.

അച്ഛനും അമ്മയും വീട്ടിൽ നിന്നും പുറത്തു പോയ സമയത്താണ് സംഭവം. വീടിനടുത്ത് കളിച്ച് കൊണ്ടിരുന്ന പെൺകുട്ടിക്കു നേരേ അതിക്രമം നടത്തിയതിനായിരുന്നു പൊലീസ് കേസ്. 2019ൽ പട്ടണക്കാട് പൊലീസ് രജിസ്റ്റർ ചെയ്ത കേസിൽ 15 സാക്ഷികളെ വിസ്തരിക്കുകയും 15 ഓളം രേഖകൾ ഹാജരാക്കുകയും ചെയ്തു. എസ്‌ഐമാരായ അമൃത് രംഗൻ, ജിജിൻ ജോസഫ്, സിപിഒ ആശ, പ്രിയ എന്നിവർക്കായിരുന്നു അന്വേഷണച്ചുമതല. പ്രോസിക്യൂഷന് വേണ്ടി സ്‌പെഷ്യൽ പബ്‌ളിക് പ്രോസിക്യൂട്ടർ ടി. ബീന ഹാജരായി.