കാസർഗോഡ്: തൃക്കണ്ണാട് കടൽഭിത്തി നിർമ്മിക്കാത്തതിനേ ചൊല്ലി മത്സ്യത്തൊഴിലാളികളുടെ പ്രതിഷേധത്തിനിടെ സംഘർഷം. റോഡ് ഉപരോധിച്ച് പ്രതിഷേധിക്കുന്നത് പൊലീസ് തടഞ്ഞതോടെ ഇരുകൂട്ടരും തമ്മിൽ ഉന്തും തള്ളുമുണ്ടായി.
മത്സ്യബന്ധന വള്ളങ്ങൾ റോഡിന് കുറുകെ വച്ച് മത്സ്യത്തൊഴിലാളികൾ പ്രതിഷേധം തുടരുകയാണ്. കടൽഭിത്തി നിർമ്മിക്കാമെന്ന് ജില്ലാ കളക്ടർ നേരിട്ടെത്തി ഉറപ്പ് നൽകാതെ പ്രതിഷേധം അവസാനിപ്പിക്കില്ലെന്ന നിലപാടിലാണ് ഇവർ. സ്ത്രീകളടക്കമുള്ള ആളുകൾ മുദ്രാവാക്യം വിളിച്ച് പ്രതിഷേധം തുടരുകയാണ്. തിങ്കളാഴ്ച വൈകുന്നേരം ഇവർ സൂചനാ പ്രതിഷേധം നടത്തിയിരുന്നു. ഇന്ന് രാവിലെ പത്തിനകം കളക്ടർ നേരിട്ടെത്തി ഉറപ്പ് നൽകണമെന്നായിരുന്നു ആവശ്യം.
എന്നാൽ രാവിലെ ചില പരിപാടികൾ ഉള്ളതിനാൽ ഉച്ചയ്ക്ക് രണ്ടരയ്ക്ക് ശേഷം ഇവിടെയെത്താമെന്ന് കളക്ടർ അറിയിച്ചതോടെ റോഡ് ഉപരോധിച്ച് സമരം തുടങ്ങുകയായിരുന്നു. കടൽക്ഷോഭം മൂലം ഓരോ വർഷവും പ്രദേശത്ത് രണ്ടോ മൂന്നോ വീടുകൾ വീതം തകരുന്നുണ്ടെന്ന് പ്രതിഷേധക്കാർ പറയുന്നു. വലയും മറ്റ് സാധനങ്ങളും സൂക്ഷിക്കുന്ന ഒരു കെട്ടിടവും കഴിഞ്ഞ ദിവസം ഇവിടെ കടൽക്ഷോഭത്തിൽ തകർന്നിരുന്നു.
